Hazrat Shoaib alaihissalam

Hazrat Shoaib alaihissalam
Hazrat Shoaib alaihissalam ko do qaumon ki taraf Rasool bana kar bheja gaya ek “madyan” aur
dusre “as’haabe ika”, aap choonki madyan qabeela se the isliye jab madyan ka zikr hua to farmaya
“Aur madyan ki biradari se Shoaib alaihissalam ko bheja” aur as’haabe ika ke zikr mein اخوھم nahin
kaha balki sirf kaha “Aur jab unko Shoaib alaihissalam ne kaha” Is tarah donon qaumon par azaab
bhi mukhtalif qism ke the jinka zikr “In sha ALLAH TA’ALA” baad mein aayega albatta donon
qaumon ke log qareeb qareeb faasla par rehne ki wajah se ek dusre ke sath rawaabit ki wajah se ek
jaise amal kiya karte the isliye donon ko hazrat Shoaib alaihissalam ne tableegh ek jaisi farmai.
Shoaib alaihissalam ki madyan ko tableegh
“Aur madyan ki taraf unki biradari se Shoaib (alaihissalam) ko bheja kaha aey meri
qaum ALLAH TA’ALA ki ibadat karo uske siwa koi tumhara mabood nahin beshak
tumhare paas tumhare Rab ki taraf se raushan daleel aai to naap aur taul poori karo
aur logon ki cheezein ghata kar na do aur zameen mein intezaam ke baad fasaad na
failao, ye tumhara bhala hai agar imaan laao. Aur har raasta par yoon na baitho ke
raahgeeron ko darao aur ALLAH TA’ALA ki raah se unhein roko jo us par imaan
laaye aur ismein kaji (tedhapan) chaho aur yaad karo jab tum thode the usne
tumhein badha diya aur dekho fasadiyon ka kya anjaam hua?”
Madyan asal mein hazrat Ibrahim alaihissalam ke ek bete ka naam hai uski aulaad par bhi madyan
hi bola jaata raha yaani ek qabeela ka naam madyan hua to phir usi qabeele ke logon ne ek shehar
aabad kiya uska naam bhi madyan rakha hazrat Shoaib alaihissalam us qabeele ke fard the. Aap
alaihissalam ka nasab yoon bayan kiya gaya hai “Shoaib bin nuwaib bin madyan bin Ibrahim
khaleelullah alaihissalam”.
In aayate kareema mein zikr hai ke Shoaib alaihissalam ne apni qaum ko teen cheezon ka hukm
diya aur ek ye ke unko ALLAH TA’ALA ki ibadat ka hukm diya aur ghair Allah ki ibadat se mana
kiya, tamam Ambiya -e- kiraam ki shari’aton mein ye qanoon motabar raha Shoaib alaihissalam
ne is qanoon ke mutabiq apni qaum ko kaha “Aey meri qaum ALLAH TA’ALA ki ibadat karo
uske baghair tumhara koi mabood nahin”
Dusri baat ye thi ke aap ne apni nubuwwat ka daawa kiya aur farmaya “Beshak tumhare paas
tumhare Rab ki taraf se raushan daleel aai”
Yahan بينة se muraad mojiza hai isliye ke har muddai e nubuwwat ke liye zaruri hota hai ke wo
apna mojiza dikhaye agar uske paas koi mojiza na ho to wo Nabi nahin hoga balki mutnabbi
(jhoota nubuwwat ka daawedaar) hoga.
Is aayate kareema se ye waazeh hua ke aap alaihissalam ko mojiza haasil tha jo aapki sadaaqat par
dalaalat karta tha albatta ye mojiza kya tha uska zikr Quran paak aur hadees mein waazeh taur par
nahin albatta sahibe kashshaaf ne bayan kiya hai ke aap alaihissalam ne Moosa alaihissalam ko aasa
diya tha jisse aap ne jadoogaron ka muqabla kiya tha aur unke bade bade saanpon ko nigal liya tha
ye aapka mojiza tha, Isi tarah aap ne Moosa alaihissalam ko bataya tha ke unki bakriyon ke bachhe
syaah safed rang ke honge to aisa hi hua.
tAZKIRATUL AMBIYA Hazrate Shoaib
245
Teesri baat jo aap ne apni qaum se kahi wo ye thi ke unhein buraiyon se roka tamam Ambiya -ekiraam ki ye aadate shareefa rahi ke wo apni qaumon ko buraiyon se rokte rahe khusoosan sabse
badi burai se rokne mein zyada tawajjo dete rahe aur isi se ibteda karte, aap ne bhi apni qaum ko
sabse pehle ye kaha “Naap aur taul ko poora karo”
Choonki Shoaib alaihissalam ki qaum ke log taajir the wo naap taul mein kami karte the is tarah
logon ka maal najaiz tareeqa se hadap karte the is burai par fitna fasaad murattab hota tha isliye
sabse pehle isi cheez ki taraf aap ne tawajjo farmai, naap taul ko poora karna ka hukm dene ke
baad umoomi taur par ye irshad farmaya “Aur logon ki cheezein ghata kar na do” ye irshad tamam
qism ki buraiyon se rokne ko shamil hai yaani kisi ka maal na chheeno (ghasab na karo), chori na
karo, rishwat na lo, daaka na daalo, kisi tarah bhi kisi heela se bhi logon ka maal na batoro.
Iske baad aap alaihissalam ne farmaya “Aur zameen mein inteqaam ke baad fasaad na failao”
zameen mein fasaad phailana deen wa dunya ko barbaad karna hai ALLAH TA’ALA ne apne Nabi
bhej kar jab zameen mein islaah paida kar di, ek khaas nizaam par muntazim kar diya to ab tum
buraiyon ke irtikaab se ismein fasaad na phailao. Isi tarah jab ALLAH TA’ALA ne tumhein kaseer
maal aur nematein ata karke zameen mein intezaam paida kar diya to tum ismein haraam ki
aamezish (milawat) karke fasaad kyun phailate ho? In tamam umoor ka maqsad ye hai ke tum
ALLAH TA’ALA ke amar ki tazeem baja lao yaani ALLAH TA’ALA ki wehdaniyat aur apne Nabi
ki nubuwwat ko tasleem karo, ALLAH TA’ALA ki makhlooq par meharbani karo agarche tum
tamam makhlooq ko nafa to nahin pahuncha sakte lekin kam se kam fasaad ko chhod kar kam
taulne kam naapne ko chhod kar aur har qism ke shar se door reh kar ALLAH TA’ALA ki
makhlooq ko iza (takleef) se to bacha sakte ho, agar tum imaan laate ho to tumhare liye ALLAH
TA’ALA ke ahkaam par amal karna hi behtar hai.
Shoaib alaihissalam ne apni qaum ko kaha
“Aur har raasta par yoon na baitho ke raahgeeron ko darao ALLAH TA’ALA ki raah se unhein
roko jo us par imaan laaye aur ismein kaji chaho” صاطَ ka ek maayne yahan raasta liya gaya hai,
Shoaib alaihissalam ki qaum ka ye tareeqa tha ke wo log raaste par baith jaate aur Shoaib
alaihissalam par imaan laane wala jo shakhs bhi wahan se guzarta usey darate dhamkate, dusra
maayne deen ke tareeqe yaani ab matlab hoga ke tum shaitan ke tareeqe par na chalo kyun ke usne
kaha tha “Main zarur zarur unke raaste par baithunga” yaani jis tarah shaitan ka kaam hai ke wo
insaan ko deeni raah par chalne se rokta hai tum bhi wo tareeqa ikhtiyar na karo.
Shoaib alaihissalam ki qaum ke log aap par imaan laane walon ko teen tareeqe se rokte the Rab
ta’ala ne inhein teen tareeqon se mana kiya ke aisa na karo wo kabhi dara dhamka kar logon ko
seedhi raah se bargashta karte aur kabhi waise hi unko baaton mein laga kar neki ke kaam se rokne
ki koshish karte aur kabhi deen mein apni himaaqat ki wajah se aitraaz karte aur usmein nuqs
nikaal ne ki koshish karte. Iske baad ALLAH TA’ALA ne apne Nabi ke zariye unhein apni nemat
yaad dilaai aur kaha “Aur yaad karo jab tum thode the usne tumhein badhaya” yaani jab ALLAH
TA’ALA ke tum par kaseer inamaat hain to tumhein chahiye ke tum ALLAH TA’ALA ki ita’at
karo, uski ibadat karo aur uski nafarmani se door raho.
Kasrat ke teen maqsad ho sakte hain1) Tum tadad mein thode the ALLAH TA’ALA ne tumhein badha diya yaani ab tum taadad mein
tAZKIRATUL AMBIYA Hazrate Shoaib
246
bahut zyada ho uska tum par ahsaan e azeem hai.
2) Tum ghareeb the tumhare paas maal wa daulat nahin thi ALLAH TA’ALA ne tumhare maal
wa daulat ko badha diya haq ye tha ke tum uske is azeem ahsaan ka shukr ada karte aur halaal
tareeqe se maal haasil karte lekin tum ne to haraam tareeqe se maal batorna shuru kar rakha hai.
3) Tum kamzor the usne tumhein taaqatwar bana diya, jinki taaqat kam ho wo khwah kitni taadad
mein kyun na ho’n wo qaleel hi nazar aate hain unko kisi bhi qism ka rob aur dabdaba haasil nahin
hota lekin jinhein ALLAH TA’ALA taaqat de de wo kaseer tadad walon par bhaari hone ki wajah
se kaseer hote hain.
Phir aap ne apni qaum ko ibrat haasil karne ka sabaq dete huye irshad farmaya “Dekho fasadiyon
ka kya anjaam hua” yaani tum se pehle jo sarkash aur zaalim ALLAH TA’ALA ke nafarman huye
unhein siwaye zillat wa ruswai aur azaab e ilaahi ke kuchh haasil nahin hua agar tum bhi is haal
par rahe to tumhara bhi yehi anjaam hoga.
Halaal maal mein hi bhalai hai
Hazrat Shoaib alaihissalam ne jab apni qaum ko logon ko cheezein ghata kar dene aur zameen
mein fasaad phailane se mana kiya to sath hi rizq e halaal par iktefa karne ki targheeb bhi di irshad
farmaya “Allah ka diya jo bach rahe wo bach rahe wo tumhare liye behtar hai agar tumhein yaqeen
ho aur main koi tum par nigehbaan nahin”
Aapke irshad ka ye maqsad tha ke agar tum ne naap taul mein kami na ki, logon ko unke huqooq
poore karke diye aur kisi ke maal mein kami na ki to jo maal tumhare paas bacha rahega usmein
ALLAH TA’ALA khair wa barkat ata farmayega aur rizq ka darwaza khol dega aur Rab ki ita’at
mein jo azeem sawaab haasil hona hai wo dunya ke maal se qadr wa manzilat ke lihaaz par azeem
darja rakhega.
Ye baat samajh mein usey hi aa sakti hai jise imaan aur yaqeen haasil ho, ke maut bhi aani hai aur
is jaahan ke baghair ek aur jaahan bhi hai jahan hisaab wa kitaab hona hai aur sawaab wa azaab
bhi haasil hona hai yaqeen kaamil ho to phir yehi insaan buraiyon se ijtinaab (bach) kar sakta hai.
Aur aap alaihissalam ne farmaya ke mera kaam sirf tumhein bhalai ki naseehat karna hai main
tumhein buraiyon ke irtikaab se mana karne ki taaqat nahin rakhta neez agar tum ne bure aamaal
na chhode aur unki nahoosat se tumhari nematon ka zawaal ho gaya aur maal wa daulat barbaad
ho gaya to main tumhein nahin bacha sakunga.
Qaum ka bataure tanz jawab
“Bole aey Shoaib kya tumhari namaz tumhein ye hukm deti hai ke hum apne baap
dada ke khuda’o ko chhod dein ya apne maal mein jo chahein na karein. Haan ji
tum bade aqalmand nek chalan ho”
Shoaib alaihissalam ne qaum ko ALLAH TA’ALA ki wehdaniyat par imaan laane aur uske baghair
kisi ki ibadat na karne ka hukm diya to qaum ne kaha ke hum to apne baap dada ke tareeqe ko
nahin chhod sakte wo kai maboodon ki ibadat karte the hum bhi yehi karenge. Aur aap
alaihissalam ne qaum ko kam taulne aur kam naapne se mana kiya aur kaha ke logon ko cheezein
ghata kar na do to wo kehne lage ke hum to maal jama karna chahte hain, maal jama karne ke
mukhtalif hathkande hain hum jis tarah jama karne ka iraada rakhte hain iske khilaaf koi qadam
uthane ke liye taiyar nahin. Tanzan unhone kaha ke tum bade namazi, imaandaar aur deendaar
tAZKIRATUL AMBIYA Hazrate Shoaib
247
bane baithe ho ye tumhari namazein tumhein kehti hain ke tum humein apne baap dada ke deen
se pher do aur humein maal jama na karne do, haan ji tum bade aqalmand aur nek chalan samajhte
ho apne aapko hum to tumhein bewakoof samajhte hain hum tumhari baaton mein kaise aayein?
Aap ne kaha main jo kehta hoon wo hi karta hoon
“Kaha aey meri qaum bhala batao agar main apne Rab ki taraf se raushan daleel par
hoon aur usne mujhe apne paas se achhi rozi di aur main nahin chahta hoon ke jis
baat se tumhein mana karta hoon aap uske khilaaf lagu main to jahan tak bane
sanwarna hi chahta hoon aur meri taufeeq ALLAH TA’ALA ki hi taraf se hai maine
usi ki taraf bharosa kiya aur usi ki taraf rujoo karta hoon”
Aap alaihissalam ne farmaya ke ALLAH TA’ALA ne mujhe ilme hidayat e deen aur nubuwwat ata
ki hai aur mujhe rizq e halaal bahut zyada ata kiya hai (yaad rahe hazrat Shoaib alaihissalam bahut
maaldaar the) jab ALLAH TA’ALA ne mujhe sa’adat e ruhaniya yaani nubuwwat wa mojizaat aur
sa’adat e jismaniya yaani maal wa rizq e halaal ata kiya hai to ye kaise ho sakta hai ke itne azeem
inamaat ke hote huye ALLAH TA’ALA ki “wahi” aur uske awaamir wa nawaahi mein khayanat
karu? Khayaal rahe ke ُ
د
ْ
ِشي
َ
ّ
الر
ْمُ
ِلی
َ
ْ
َتاحل
ْ
ن
َ
ٓل
كَ
َ
ّ
انِ ka ek matlab ye bhi hai ke unhone aapke hausla aur
aqalmandi ka aitraaf karte huye kaha ke tum to hauslamand aur aqalmand ho phir bhi humein
apne aaba wa ajdaad ke deen se kyun rokte ho to aap alaihissalam ne farmaya ke jab tum meri
aqalmandi ke muatarif ho to samajh lo ke main tumhein behtar raah par chalana chahta hoon aur
khud bhi is par qaa’im hoon aisa nahin ho sakta ke main tumhein to bure aamaal se mana karu
aur khud un par amal karu mujhe ALLAH TA’ALA par bharosa haasil hai aur mujhe uski taraf
rujoo karna hai.
Nabi ki mukhalifat azaab ka sabab
“Aur meri qaum hargiz na uksaaye tumhein mere adaawat (Allah ki nafarmani par)
mubaada pahunche tumhein bhi aisa azaab jo pahuncha tha qaume Nooh ya qaume
Hood ya qaume Saaleh ko aur qaume Looth to tum se kuchh door nahin aur
maghfirat talab karo apne Rab se phir (dil wa jaan se) rujoo karo uski taraf beshak
mera Rab bada meharbaan (aur) pyaar karne wala hai”
Yaani aap ne apni qaum ko farmaya aey meri qaum meri mukhalifat aur adaawat ki wajah se tum
ALLAH TA’ALA ke azaab ko haasil na karo.
Agar tum isi tarah meri adaawat par qaa’im rahe to tum bhi aise tabaah wa barbaad ho jaoge jaise
Nooh, Hood aur Looth alaihimussalam ki qaumein tabaah wa barbaad ho gai, unka koi naam wa
nishaan na raha aur Looth alaihissalam ki tabaah shuda bastiyan tumhare ilaaqe se koi door nahin
aur unka zamana bhi tumhare zamane se koi door nahin, tumhein chahiye ke tum apne tamam
jaraa’im (gunaah) ko chhod kar ALLAH TA’ALA ki taraf rujoo karo usse maghfirat talab karo
ALLAH TA’ALA bahut kareem hai raheem hai wo kabhi apni taraf jhukne walon ko apni rehmat
se mehroom nahin karta, tumhein chahiye ke tum uski rehmat se kabhi mayoos na ho.
Qaum ke jawabaat
Shoaib alaihissalam ne qaum ko raahe haq ki tableegh farmai unhein azaab se bachne aur ALLAH
TA’ALA ki rehmat haasil karne ki targheeb di lekin qaum ne aapko dhamkiyan deni shuru kar di.
tAZKIRATUL AMBIYA Hazrate Shoaib
248
“Unhone kaha ke aey Shoaib! humari samajh mein nahin aati tumhari bahut si
baatein aur beshak hum tumhein apne mein bahut kamzor dekhte hain aur agar
tumhara kunba na hota to hum ne tumhein pathraaw kar diya hota aur humari
nigaah mein tumhari kuchh izzat nahin”
Hazrat Shoaib alaihissalam unke sath unki zabaan mein kalaam farma rahe the lekin wo phir bhi
kehne lage ke humein tumhari baatein samajh mein nahin aati kyun ke wo aapki baaton se bahut
zyada nafrat karne ki wajah se tawajjo nahin dete the goya ke unke kaanon par parde chhaaye huye
the aur jo sun lete wo bhi aapki baaton ko haqeer samajh kar thukra dete the goya ke unka sunna
aur na sunna barabar hota tha aur aap ne unhein tauheed, nubuwat aur qiyamat par imaan laane
aur zulm Looth khasot ke chhod ne par jin dalaail se qaa’il karne ki koshish ki unhone kaha humare
nazdeek in dalaail ki koi haisiyat nahin humein goya dalaail sunai hi nahin dete.
Qaum ne aap alaihissalam ko kaha ke tum humare qabeela se ho, tumhara khandaan humare
nazdeek izzat wa ahteraam wala hai agarche tumhari izzat humare nazdeek kuchh nahin aur na hi
koi tum itne bahadur ho hum sirf tumhein tumhare khandaan ki wajah se chhod rahe hain warna
tum par pathraaw karke tumhein halaak kar daalte.
Qaum ki himaaqat (bewakoofi) par taajjub
“Aap alaihissalam ne kaha aey meri qaum! kya tum mere kunbe ka dabaaw Allah se
zyada aur usey tum ne apni peeth ke pichhe daal rakha hai beshak jo tum karte ho
wo mere nazdeek Rab ke ihaat (qudrat) mein hai”
Aap alaihissalam ne apni qaum ki himaaqat par taajjub karte huye farmaya ke tum mere khandaan
ki izzat karte ho unki wajah se mujhe halaak nahin karte aur ALLAH TA’ALA ke ahkaam ko pase
pusht daal rahe ho, uski taabedaari nahin karte halanki haq ye tha ke tumhein agar meri hifazat
karni hi thi to mujhe ALLAH TA’ALA ka Nabi samajh kar meri hifazat karte isse tumhein Rab ki
khushnoodi haasil hoti mujhe dhamkiyan dene walon! ye bhi khayaal karo ke mera Rab tumhare
tamam aamaal se ba khabar hai tum kabhi uske ihaat e qudrat se bach nahin sakte.
Mutakabbir sardaron ne kaha
“Aapki qaum ke mutakabbir sardaar bole aey Shoaib qasam hai ke tumhein aur
tumhare sath wale musalmanon ko apni basti se nikaal denge ya tum humare deen
mein aa jao”
Aapki qaum ke raais wa sardaar log jo bahut bade mutakabbir the aap alaihissalam ko dhamkiyan
dene lage ke tum humare deen mein aa jao aur tumhare sath jo musalman hain wo bhi humare
deen mein aa jayein agar tum ne humare deen ko qabool na kiya to hum tumhein apni basti se
nikaal denge.
Nabi dhamkiyon se nahin darte
“Kaha kya agarche hum bezaar hain zarur hum ALLAH TA’ALA par jhoot
baandhenge agar tumhare deen mein aa jayein baad iske ke ALLAH TA’ALA ne
humein isse bachaya hai”
Aap alaihissalam ne apni qaum ki dhamkiyon ki parwah na karte huye do took alfaaz mein jawab
diya ke kya hum us deen mein aa jayein jisse hum bezaar hain, jo humein napasand hai ye kabhi
tAZKIRATUL AMBIYA Hazrate Shoaib
249
nahin ho sakta ALLAH TA’ALA ka azeem ahsaan hai hum par jisne humein tumhare baatil deen
se mehfooz rakha hua hai agar tumhare kehne par hum is deen mein aa jayein to ye ALLAH
TA’ALA par iftara (jhoot baandhna) laazim aayega kya tum ye khayaal karte ho ke ALLAH
TA’ALA ka Nabi aur us par imaan laane wale ALLAH TA’ALA par jhoot baandh sakte hain? Ye
tasawwur karna bhi namumkin hai ye khayaal bhi muhaal hai.
Faisla kun baat
“Aur aey qaum tum apni jagah apne kaam kiye jao main apna kaam karta hoon jald
hi tumhein pata chal jayega kis par aata hai wo azaab ke usey ruswa karega aur kaun
jhoota hai? Aur intezaar karo main bhi tumhare sath intezaar mein hoon”
Yaani aap ne apni qaum ko kaha ke tum apni taaqat ke mutabiq jo chaho kar lo mujhe agar takleef
pahuncha sakte ho to pahuncha lo lekin ye bhi khayaal kar lo main bhi koi be sahaara nahin mera
bhi koi hai, mujhe bhi usne badi qudraton se nawaza hai bas ab tum apna kaam karo main apna
kaam karta hoon. Qaum ne kaha phir kya hoga aap ne farmaya kuchh der to nahin tumhein
anqareeb hi pata chal jayega ke ruswa karne wala azaab kis par aata hai aur jhoota kaun hai? Wo
qaumein jinhone Ambiya -e- kiraam ki takzeeb (jhutlaaya) ki, ALLAH TA’ALA ke ahkaam tasleem
nahin kiye unke liye Rab ne yehi faisla farmaya ke unko tabaah wa barbaad kar diya jaaye ab
tumhare liye bhi faisla ki gharhi aana hi chahti hai tum bhi intezaar karo aur main bhi intezaar
karta hoon sab kuchh waazeh ho jayega.
ALLAH TA’ALA ke azaab ka aana aur madyan ki tabaahi
“Aur jab tumhara hukm aaya humne Shoaib (alaihissalam) aur uske sath ke
musalmanon ko apni rehmat farma kar bacha liya aur zaalimon ko garajdaar aawaz
ne aa liya to subah apne gharon mein ghutnon ke bal pade reh gaye goya kabhi
wahan base hi na the aur door ho’n madyan jaise door huye Samood”
Rab ta’ala ne farmaya jab humare azaab ka amr aa gaya to humne apne ek firishte ko bheja jiski
aawaz se sab mar gaye. Wo aawaz Jibreel alaihissalam ki thi jab aap ne zordaar garajdaar aawaz se
unhein kaha mar jao to har ek ki rooh nikal gai aur apne apne gharon mein sab aaundhe gire huye
paaye gaye, Is tarah unko tabaah wa barbaad kar diya gaya jaise ke wahan ye log kabhi baste hi
nahin the.
Qaum madyan ko aisa hi azaab diya gaya jaise qaume Samood ko azaab diya gaya. Hazrat Ibne
Abbas radiallaho ta’ala anhuma ne farmaya ALLAH TA’ALA ne do ummaton ko ek jaisa azaab
nahin diya siwaye Shoaib alaihissalam aur hazrat Saaleh alaihissalam ki qaum ke, un donon
qaumon ko zordaar aawaz se halaak kar diya gaya Saaleh alaihissalam ki qaum ke paas wo aawaz
neeche se aai aur Shoaib alaihissalam ki qaum ke paas wo aawaz upar se aai.
Shoaib alaihissalam aur as’haabe ika
“Jhutlaaya ahle ika ne bhi Rasoolon ko jab farmaya unhein Shoaib (alaihissalam) ne
kya tum (qehare ilaahi) se nahin darte? Beshak main tumhare liye Rasool ameen
hoon pas daro ALLAH TA’ALA se aur meri pairwi karo aur main nahin talab karta
tum se is par koi ajar mera ajar to uske zimme hai jo jahanon ko paalne wala hai.
Poora kiya karo naap aur na ho jao kam naapne waalon se aur wazan kiya karo sahi
tAZKIRATUL AMBIYA Hazrate Shoaib
250
tarazu se aur na kam diya karo logon ko unki cheezein aur na phira karo zameen
mein fasaad barpa karte huye aur daro usse jisne paida farmaya tumhein aur (tum
se) pehli makhlooq ko. Unhone (jhalla kar) kaha tum un logon mein se ho jin par
jadoo kar diya gaya hai aur nahin ho tum magar ek bashar maanind aur hum to
tumhare mutalliq ye khayaal kar rahe hain ke tum jhooton mein se ho (hum tumhari
baat nahin maante) lo ab gira do hum par aasmaan ka koi tukda agar tum raast
baazon mein se ho. Aap alaihissalam ne farmaya mera Rab khoob jaanta hai jo tum
kar rahe ho so unhone jhuthlaaya Shoaib (alaihissalam) ko to pakad liya unko
chhatri waale din ke azaab ne. Beshak ye bade din ka azaab tha, beshak ismein bhi
(ibrat ki) nishani hai aur nahin the unmein se aksar log imaan laane waale aur
yaqeenan aapka Rab hi sab par ghaalib humesha reham farmane wala hai”
Baaz hazraat ne ye khayaal farmaya ke ahle madyan aur as’haabe ika ek hi qaum ke do naam hai
lekin sahi ye hai ke ye donon alag alag qaumein thi jo alag alag ilaaqon mein aabad thi lekin
choonki unke ilaaqe bilkul nazdeek the aur donon qaumein hazrat Ibrahim alaihissalam ki nasl se
thi isliye donon ki hidayat ke liye ek Nabi hazrat Shoaib alaihissalam ko muqarrar farmaya gaya.
Neez ye donon qaumein bainul aqwaami shaahrahon ke qurb wa jawaar mein aabad thi aur tijaarat
pesha thi taajiron mein jo akhlaaqi kharabiyan aam taur par paai jaati hain wo unmein bataur qadr
mushtarak maujood thi, tauheed ke aqeeda se donon bargashta ho chuki thi aur shirk ki laanat
mein giraftaar thi isliye hazrat Shoaib alaihissalam ke mawaaiz ek hi tarah ke the.
“Wo jagah jahan ghane aur ganjaan darakhton ka zakheera ho usey arabi mein “ika” kehte hain”
Maloom hota hai ke ye qaum jis ilaaqe mein aabad thi wahan darakhton ke ghane aur ganjaan
jhund paaye jaate the isliye unhein as’haabul ika kaha gaya aur ye kisi khaas basti ka naam na tha
lekin jinhone “laika” padha hai unka khayaal hai ke “laika” ek basti ka naam tha. Allama jauhari
ki ye raaye hai ke “laika” aur “ika” donon ek hi basti ke naam hain jis tarah “makka” aur “bakka”.
Madyan ki tarah as’haabe ika ki bhi saari maa’ashi khushhaali ka inhesaar be imaaniyon aur dhoka
baaziyon par tha wo itne bhale maanas kab the ke hazrat Shoaib alaihissalam ki naseehat sun kar
un se baaz aa jaate Shoaib alaihissalam to unko ye keh rahe the “Yaani us Rab se daro jis ne tumhein
bhi paida kiya aur tum se pehle (ba qaul allama mujaahid) jo makhlooq guzar chuki hai uska bhi
wo hi khaaliq hai”
Haq to ye tha ke wo log apne islaah ki taraf tawajjo karte lekin unhone uski taraf tawajjo karna
munasib na samjha yahan tak ke apni ghalti ko maanne se inkaar kar diya balki ulta hazrat Shoaib
alaihissalam par ilzaam laga diya ke tum par kisi ne jadoo kar diya hai jab hi tum humein aise
mashware de rahe ho jin par hum agar amal karein to ye tijaarat ki gehma gehami ya daulat wa
sarwat ki farawaani sabki sab ek dam khatm ho jaaye koi ji sha’oor aadmi apni qaum ko aisa
mashwara nahin de sakta jo uski iqtesaadi tabaahi ka sabab bane, aey Shoaib! yaqeenan tumhara
dimaagh kaam nahin kar raha pehle apna ilaaj karao phir aakar humein naseehat karna aur tum
hum se koi bade bhi to nahin ho humare jaise hi ek bashar ho humein to tumhari baaton par koi
yaqeen nahin aa raha balki hum to tumhein jhooton mein se samajhte hain.
Aap alaihissalam ne qaum ki tarah tarah ki behoodgiyon ko khaatir mein na laate huye tableegh
ka fareeza jaari rakha, unko dhoka baaziyon se baaz aane ke mutalliq israar karte rahe, wo raahe
raast par aane ke bajaye seekhpa hokar aur sharm wa haya ki chaadar ko utaar kar kehne lage ke lo
tAZKIRATUL AMBIYA Hazrate Shoaib
251
hum tumhari baat nahin maante ab jo aasmaan tum hum par giraana chahte ho gira do. Unka
khayaal ye tha ke azaab aayega nahin, Is tarah Shoaib alaihissalam ka jhoota hona saabit ho jayega.
SubhanAllah! Nabi ka sabr aur kamaal kitna azeem hai wo log aapko jhoota keh rahe hain, jadoo
ke asraat se aafat zada keh rahe hain balki khud mutaalba kar rahe hain tumhein jo karna hai kar
lo aasmaan giraana hai gira lo hum to tumhari baaton ko maanne ke liye taiyar nahin aap phir bhi
ye keh rahe hain “Tumhare kartooton ko mera Rab behtar jaanta hai” yaani aap ne in haalat ke
bawajood maamla Rab ke supurd kar diya, unki halaakat ki dua na ki aur ye nahin arz kiya aey
Allah ab too in par azaab bhej hi de balki kamaal e sabr ka muzaahira karte huye maamla ALLAH
TA’ALA ke supurd kar diya.
Jab unhone baar baar Shoaib alaihissalam ki takzeeb ki to ALLAH TA’ALA ne un par azaab naazil
kar diya, saat(7) din tak ALLAH TA’ALA ne un par hawa ko rok liya aur ret ko musallat kar diya,
unke dam ghutne lage na unhein koi saaya nafa pahuncha sakta aur na hi paani wo pareshan hokar
jungle ki taraf nikle aur un par ek baadal ne aakar saaya kar diya jisse unhein khoob thandak
mehsoos hui aur baade naseem ke khushgawaar maze Loothne lage, Is tarah us baadal ke saaya
mein jama ho gaye to yakayak un par aag ki baarish baras ne lagi jisse sab jal kar raakh ho gaye aise
tabaah wa barbaad huye ke unka naam wa nishaan bhi mit gaya, Rab ta’ala ne unki basti ko safah
e hasti se aise mitaya ke goya yahan koi basti thi hi nahin