Khana e ka’aba ki tareekh
Adam alaihissalam ka ka’aba ki tameer
Ibne Asaakar waghaira se Tafseer Azeezi mein naql kiya gaya hai Hazrate Adam alaihissalam jab jannat se zameen par tashreef laaye to bargah e ilaahi mein arz kiya:
“Khudaya main yahan na to malaika ki tasbeeh wa takbeer sunta hoon aur na koi ibadat gaah dekhta hoon jaise ke aasman mein Baitul Mamoor dekhta tha jiske ird gird malaika tawaaf karte the”
ALLAH TA’ALA ne irshad farmaya:
“Jao jahan hum nishaan batate hain wahan ka’aba bana kar uske ird gird tawaaf bhi kar lo aur uski taraf namaz bhi ada karo”.
Hazrate Jibreel alaihissalam Adam alaihissalam ki rehbari ke liye unke sath chale aur unhein wahan laaye jahan se zameen bani thi yaani ka’aba ki jagah se hi sabse pehle paani par jhaag phir jhaag se zameen ki ibteda (shuruaat) hui. Jibreel alaihissalam ne wahan apna parr maar kar saatwi zameen tak buniyaad daali di jisko malaika ne 5 pahadon ke pattharon se bhara Kohe Libnaan, Kohe Toor, Joodi, Hira aur Toore Seena se buniyaad bhar kar nishaan ke liye har chihaar taraf ko deewar utha di us taraf munh karke Adam alaihissalam namaz padhte rahe aur uska tawaaf bhi karte rahe.
Baaz riwayaat mein aaya hai ke Baitul Mamoor ko us buniyaad par rakh diya gaya toofane Nooh mein baitul mamoor ko utha liya gaya aur ka’aba ki jagah unche teele ki tarah reh gai, log yahan aate rahe aur barkat ki dua mangte rahe.
Ibrahim alaihissalam ka tameer karna
Ibrahim alaihissalam ne jab hazrat Haajra radiallaho ta’ala anha aur apne bete Ismail alaihissalam ko yahan chhoda aur yahan aabadi ho gai to Ibrahim alaihissalam ko hukm diya gaya ke Ismail alaihissalam ko sath lekar ka’aba tameer karo, ek baadal ka tukda bhej kar ka’aba ki had ko waazeh kiya gaya aur Jibreel alaihissalam ne khat (had) kheench diya hazrat Ibrahim alaihissalam ne Adam alaihissalam ke zamana ki buniyadon par hi imaarat tameer farmai.
Ka’aba shareef ki bulandi 9 hath, rukn aswad se rukn shaami tak 33 hath, rukn gharbi se rukn yamaani tak 31 hath, rukn yamaani se rukn aswad tak 20 hath, rukn shaami se rukn gharbi tak 22 hath yaani ka’aba us waqt mustateel (jiske aamne saamne ki donon deewarein barabar ho’n chaukor na ho’n) tha lekin tool aur arz ki ek ek deewar mamooli chhoti thi darwaze do banaye gaye the jo zameen ke sath mile huye the kiwaad zanjeer waghaira nahin the baad mein taba’a hameeri ke zamane mein kiwaad zanjeer waghaira lagaye gaye, hazrat Ibrahim alaihissalam ne tameer farmaya aur hazrat Ismail alaihissalam patthar gaara waghaira dete the. SubhanAllah! Kis shaan se Allah ka ghar tameer hua? Allah ka Nabi hi me’amaar aur Allah ka Nabi hi madadgaar.
Ibrahim alaihissalam ke tameer ke baad
Aapki tameer ke baad juzwi taur par mukhtalif auqaat mein tameer hui ek martaba amaalqa aur jarham ne ise tameer kiya iske baad qusai bin kalaab ne iski tameer ki jismein chhat darakht maqal
110 AZKIRATUL AMBIYA Hazrate ibrahim wa ismail wa ishaaq
ki lakdi ki banai jis par bajaye takhton ke khurme ki lakdi daali.
Quraish ki tameer
Ek aurat ka’aba shareef mein khushbu sulgaati thi, ek baar achanak usse shola utha aur chhat jal gai aur deewarein pehle hi bosida ho chuki thi isliye quraish ne faisla kiya ke mukammal taur par nai (new) tameer ki jaaye Waleed bin mugheera ko imaarat ka ameer muqarrar kiya gaya aur ye tay hua ke ismein halaal maal kharch hoga us waqt ke ameer logon ke paas zyada sood se haasil karda maal hota tha isliye halaal maal kam miqdaar mein jama hua to quraish ne maal ki kami aur kuchh apne maqasid ke peshe nazar chand farq kar diye-
-
Ka’aba ki kuchh zameen baahar nikaal di yaani imaarat ko chhota kar diya, ka’aba se baahar nikaali hui zameen ko hateem kaha jata hai isi mein meezabe rehmat (parnaala) girta hai, chhoti chhoti deewar se aaj bhi ise alag numayan kiya hua hai tawaaf iske baahar se hi hota hai.
-
Quraish ne do darwazon ke bajaye ek kar diya wo bhi buland taaki jise chahein andar jaane dein aur jise chahein na jaane dein ab bhi isi par amal ho raha hai badshahon ke liye darwaza khulta hai khwah wo kitne hi badkaar kyun na ho’n sulha wa atqiya ke liye kabhi darwaza khulne ki khabar nahin suni gai.
-
Khana ka’aba ke andar lakdi ke satoonon ki do safein banai gai aur har saf mein teen satoon banaye gaye.
-
Ka’aba shareef ki bulandi pehle se duguni kar di gai pehle bulandi 9 hath thi unhone 18 hath kar di.
-
Khana ka’aba ke andar rukn shaami ke qareeb ek zeena banaya gaya jisse chhat par chhad sakein.
Hazrat abdullah bin zubair radiallaho ta’ala anhu ki tameer
Hazrate Aaisha siddiqa radiallaho ta’ala anha farmati hain:
“Ek martaba Rasoolullah ﷺ ne ka’aba ke muttasil (yaani hateem) buniyaade Ibrahim ke patthar mujhe dikhaye aur farmaya ke quraish ne ismein kami kar di thi log agar naye naye musalman na hote aur unke jazbaat bhadakne ka andesha na hota to main Ibrahimi buniyadon par ka’aba dobara tameer kar deta”.
Isi riwayat ki buniyaad par Hazrat Abdullah bin Zubair ne ka’aba shareef ko munhadim (gira kar) karke dobara tameer kiya, hateem ko ka’aba mein dakhil kiya, darwaze do banaye jo zameen ke muttasil the, khushbudaar mitti choona mein mila kar lagaya gaya, darwazon par andar baahar ambar laga kar khushbudaar kiya gaya, nihayat qeemati reshmi ghilaaf chadhaya gaya.
Khayaal rahe ke sabse pehle ka’aba shareef ko ghilaaf chadhane wale ka naam Asad hai jo shah Yeman tha aur taba’a ke laqab se mashhoor tha Madina taiyaba ki shehari buniyaad rakhne wala ye shakhs tha.
Abdullah bin Zubair ki tameer 27 rajab 64 hijri ko mukammal hui phir Hajjaj bin Yusuf (jo Abdul Maalik bin Marwaan ka naa’ib tha) ne 74 hijri mein imaarat ko munhdim karke phir usi tarah bana diya jaise quraish ne banaya tha phir Haroon rasheed ne chaha ke ka’aba us tarah bana diya jaaye jaise Abdullah bin Zubair radiallaho ta’ala anhu ne tameer kiya tha yaani darasal wo hi Ibrahimi tameer bhi thi lekin us waqt ke ahle ilm ne isliye mana kiya ke koi tumhara mukhalif aayega wo phir tabdeel karega is tarah girana aur banana ek khel ban jayega. Iske baad marammat to hoti rahi lekin mukammal taur par poori imaarat ko dobara nahin banaya gaya.
111 AZKIRATUL AMBIYA Hazrate ibrahim wa ismail wa ishaaq
Ka’aba ki maujooda tameer
1040 hijri mein Sultan Muraad bin Ahmad Khan shaahe qustuntuniya ne jab dekha ke is ki imaarat bahut purani ho gai hai to usne siwaye rukn hajre aswad (wo kona jismein hajre aswad nasab hai) ke tamam imaarat munhadim karke nai tameer karai lekin inhi buniyadon aur isi tarz par jo Hajjaj bin Yusuf ne banai thi, andar sange marmar ka farsh bichhaya aur andar chhat par nihayat nafees makhmali chhat geeri lagai gai aur baahar ki deewarein sange khaara se choona mein chuni, nihayat nafees reshmi siyaah parda tamam khana ka’aba par daala jis par kalima taiyaba La Ilaaha Illallaah Muhammadur Rasoolullah ﷺ likha hua tha aur sunhare haashiya par sultan ka naam tha.
Maujooda Ka’aba shareef sultan muraad ka banaya hua hai yaani mukammal imaarat ko munhadim (gira kar) karke iske baad naye sire se tameer nahin kiya gaya.
Ghilaafe ka’aba har saal misr se badi dhoom dhaam se aata raha ek martaba pakistan ke shehar lahore se bhi ban kar gaya, pehle ye tareeqa tha ke purana ghilaafe ka’aba khuddam ko de diya jaata log tabarruk ke taur par ise khareed lete the lekin ab ghilaaf ka’aba saudiya mein hi banta hai is par shah saud ka naam hota hai.
Maqaam Ibrahim wa hajre aswad
Ye donon jannati yaqoot hain, bahut noorani the ALLAH TA’ALA ne inka noor mahw kar diya agar aisa na hota to ye mashriq wa maghrib ko chamkate. Maqaame Ibrahim wo patthar hai jis par khade hokar Ibrahim alaihissalam ka’aba shareef ki tameer karte jis qadr imaarat buland hoti jaati thi wo patthar bhi uncha hota jaata tha, ye patthar aap ke khade hone se narm bhi ho jaata tha ke sakhti ki wajah se aapke qadamon ko takleef na ho isiliye aapke qadamon ke nishaan is mein pad gaye the. Isi patthar ko jable Aboo Qabees par rakh kar uske upar khade hokar hazrat Ibrahim alaihissalam ne aawaz di:
“Aey Allah ke bandon haj ke liye aao”
ALLAH TA’ALA ne farmaya:
“Aur logon mein haj ka aam ailaan kar de wo tere paas haazir honge, pyaada aur har dubli untni par ke har door ki raah se aati hain”.
Aapke is ailaan ke baad un tamam logon ne labbaik kaha jinhein bhi hajj karna tha, jisko jitni martaba hajj karna tha utni martaba hi labbaik keh diya, maa’o ke rehamon mein aur aaba ki pushton mein se taa qiyamat aane walon ne labbaik kaha. Nabi Kareem ﷺ ne jab maqaame Ibrahim ki azmat ko bayan kiya to hazrat Umar radiallaho ta’ala anhu ne arz kiya ke hum iske pichhe namaz na ada kar liya karein? To Huzoor ﷺ ne wahee ke intezar mein khamoshi ikhtiyar ki lekin usi din ALLAH TA’ALA ki taraf se aayatein kareema ka nuzool ho gaya irshad hua:
“Aur (hukm diya ke) maqaame Ibrahim ko namaz padhne ki jagah bana lo”.
Maqaame Ibrahim se wo patthar muraad hai jis par khade hokar Ibrahim alaihissalam ne ka’aba moazzama ki tameer farmai, Ibrahim ke qadmeene mutahhareen ke nishanaat us par sabt hain. Tawaaf e ka’aba ke baad tawaaf ki rak’atein isi maqaam e Ibrahim ke pichhe padhi jaati hain ismein bhi ittibae millate Ibrahimi ki jhalak paai jaati hai. ALLAH TA’ALA ne apne khaleel hazrat Ibrahim ke qadmeen mutahhareen ke nishanaat ko wo azmat ata farmai ke qiyamat tak tawaaf karne walon ko hukm diya ke maqaam e Ibrahim ke pichhe (do rak’at) namaz padho, tawaafe ka’aba ke 7 chakkar mukammal karne ke baad tawaaf ki do rak’at masjide haraam mein padhna waajib hai lekin mustahab ye hai ke inhein maqaam e Ibrahim ke pichhe padha jaaye.
112 AZKIRATUL AMBIYA Hazrate ibrahim wa ismail wa ishaaq
Maqaame Ibrahim par hazrat Ibrahim alaihissalam teen martaba khade huye
-
Ibrahim alaihissalam jab kai saal guzarne ke baad Ismail alaihissalam ko milne ke liye aaye to ALLAH TA’ALA ki mansha ke mutabiq hazrat Saara radiallaho ta’ala anha se waada karke aaye ke apne bete ko dekh kar aur mulaqaat karke wapas aa jaonga sawaari se nahin utrunga, aap alaihissalam jab makka mein aaye to hazrat Ismail alaihissalam to shikar karne ke liye gaye huye the bahoo se mulaqaat hui usse guzar auqaat ke mutalliq puchha usne kaha achha guzara nahin tangdasti hai sirf shikar par guzar auqaat ho rahi hai. Aap alaihissalam ne wapas chalte huye kaha:
“Apne khawind ko mera salaam kehna aur kehna ke tumhare ghar ki chaukhat achhi nahin ise badal lo”.
Hazrat Ismail alaihissalam jab ghar aaye to khud hi puchha ke aaj koi buzurg to nahin aaye the? To aapki zauja ne kaha ke aaye the aur salaam keh kar gaye hain aur ek paigham dekar gaye hain jab paigham ki usne tafseel bayan ki to aapne apni zauja ko faarigh kar diya, ke wo tumhein faarigh kar dene ka hukm de gaye hain. Wajah ye thi ke usne Rab ta’ala ki nashukri ki thi, Nabi ki zauja ki shaan ke ye laayaq nahin ke wo kam rozi par shikayat kare balki saabir rahe.
Hazrat Ibrahim alaihissalam dobara phir Ismail alaihissalam ko milne ke liye aaye us waqt bhi Ismail alaihissalam ghar par maujood na the aap alaihissalam ki mulaqaat bahoo se hui (ye hazrat Ismail alaihissalam ki dusri shadi thi) usse ghar ke haalat puchhe usne kaha ALLAH TA’ALA ka shukr hai ke achha waqt guzar raha hai, zamzam ke paani par humara qabza hai, mere khawind shikar karke le aate hain bahut achha waqt paas ho raha hai. Hazrat Ibrahim alaihissalam jab wapas jaane lage to aapki bahoo ne israar kiya ke aap humare ghar rukein lekin aap ne kaha:
“Mujhe sawaari se utar kar zameen par aane ki ijazat nahin”
to aapki bahoo ne kaha ke aap apne paanv is patthar par rakhein taaki main inko dho lu, aap alaihissalam ne jis patthar par paanv rakhe wo maqaame Ibrahim hi tha. Aap alaihissalam ne wapas chalte huye hazrat Ismail alaihissalam ke liye salaam kaha aur paigham diya ke:
“Ghar ki chaukhat achhi hai ise mazboot rakhna”.
-
Tameere ka’aba ke waqt aap us par khade huye the wo narm ho jaata tha taaki aap alaihissalam ke paanv mubarak ko sakhti ki wajah se takleef na ho isi wajah se aap alaihissalam ke qadamon ke nishanaat ismein pad gaye, aap jab buland hona chahte the to wo patthar khud ba khud upar uth jaata tha, jab neeche aana chahte to neeche ho jaata tha aam mistriyon ki tarah aap alaihissalam ko lakdi ke takhte baandh ne ki zarurat pesh na aati thi.
-
Ka’aba shareef ki tameer ke baad aap alaihissalam ne isi patthar par khade hokar jabal aboo qabees par se logon ko hajj ki daawat di.