Hazrat Hazqeel alaihissalam
“Aey mehboob kya tum ne na dekha tha unhein jo apne gharon se nikle aur wo hazaaron the maut ke dar se to ALLAH TA’ALA ne unse farmaya mar jao! Phir unhein zinda farma diya, beshak ALLAH TA’ALA logon par fazl karne wala hai magar aksar log nashukre hain”.
Bani Israel ka Maut ke Dar se Bhaagna
Hazrat Ibne Abbas radiallaho ta’ala anhuma se marwi hai ke bani israel ke badshahon mein se ek badshah ne apni qaum ko jihaad karne ke liye kaha to gharon se baahar nikal kar wo kehne lage hum to us zameen mein nahin jayenge jahan tum humein le jaana chahte ho kyun ke wahan waba phaili hui hai, jab waba (ta’oon) wahan se zaa’il ho jayegi to phir hum jayenge. ALLAH TA’ALA ne un tamam par jo hazaaron ki tadad mein the apne ilaaqa mein hi shehar se baahar maut ko musallat kar diya wo 8 din tak usi haal mein rahe yahan tak ke unke jism phool gaye. Dusre ilaaqa ke bani israel ko jab unki maut ka ilm hua to wo unko dafan karne ke liye aaye lekin unki badboo ki wajah se wo unhein dafan karne se aajiz aa gaye isliye unhone unke ird gird ek deewar bana di.
Ek aur riwayat mein isi tarah zikr hai ke hazrat Hazqeel alaihissalam ne apni qaum ko daawate jihaad di lekin unhone buzdili ka muzaahira kiya aur jihaad mein shirkat ko napasand samjha to ALLAH TA’ALA ne un par maut musallat kar diya jab unmein se kasrat se maut hone lagi to unhone apne sheharon se maut ke dar ki wajah se bhaagna shuru kar diya.
Hazrat Hazqeel alaihissalam ki Dua aur Murdon ka Zinda Hona
Jab hazaaron ki tadad mein sheharon se baahar nikle hi the to Hazqeel alaihissalam ne dua ki:
“Aey Allah! Aey Yaqoob alaihissalam ke khuda aur aey Moosa ke khuda too apne bandon ki nafarmani dekh raha hai too inhein apni koi nishani dikha jisse inhein teri qudrat ka pata chal jaaye ke wo tere qabza e qudrat se nahin nikal sakte.”
Aapki is dua ke baad ALLAH TA’ALA ne aapki qaum par maut musallat kar di wo hazaaron ki tadad mein shehar se nikle hi the ke mar gaye. Hazrat Hazqeel alaihissalam ne jab hazaaron ki tadad mein apni qaum ke afraad ko mara hua dekha to aapko pareshani laahiq hui khayaal hua ke ye dobara zinda ho jayein to ALLAH TA’ALA ne aapki taraf “wahi” ki aur zinda karne ke marahil tay kiye:
-
Haddiyon ka Jama Hona: Aey Hazqeel tum haddiyon ko kaho aey haddiyon tumhein ALLAH TA’ALA hukm deta hai ke tum jama ho jao. Aapke kehne par wo tamam haddiyan ek dusre se mil kar jismon ke dhaanche mein mukammal ho gaye lekin abhi tak unmein gosht aur khoon nahin tha.
-
Gosht ka Libaas: Phir ALLAH TA’ALA ne aapki taraf “wahi” ki ke ab tum ye kaho aey jismon! ALLAH TA’ALA tumhein hukm deta hai ke tum apne gosht ka libaas pehan lo, is tarah ALLAH TA’ALA ne un par gosht chadha diya.
-
Zindagi aur Uthna: Phir ALLAH TA’ALA ne aapki taraf “wahi” ki ab tum kaho aey jismon! ALLAH TA’ALA tumhein hukm deta hai ke tum ab uth khade ho.
Is tarah ALLAH TA’ALA ne un logon ko phir se zinda kar diya jab wo zinda hokar uthe to keh rahe the:
سُبْحَانَكَ اللّٰهُمَّ وَبِحَمْدِكَ لَآ اِلٰهَ اِلَّا اَنْتَ
Zinda Hone ke Baad ke Asraat aur Ahkaam
Zinda hone ke baad bhi un par asraate maut baaqi rahe yahan tak ke jis tarah maut ke waqt unka rang zard hua tha usi tarah zard hi raha. Aur unke marne ki wajah se jo unke jismon mein badboo paida hui thi wo unke paida hone ke baad bhi baaqi rahi balki aaj tak unki aulaad mein bhi boo paai jaati hai.
Khayaal rahe ke maut ke baad insaan mukallaf nahin rehta, us par awaamir wa nawaahi khatm ho jaate hain lekin un logon ko zinda karne ke baad bhi mukallaf banaya gaya kyun ke:
-
Ya to unhein maut ke waqt sakraate maut aur maut ki wajah se laahiq hone wali haulnakiyan nahin haasil hui thi.
-
Ya ye cheezein to haasil hui thi lekin ALLAH TA’ALA ne unse bhula di kyun ke ALLAH TA’ALA jo zinda karne par qaadir hai wo kisi cheez ko zehanon se mitane par bhi qaadir hai.
-
Ya ye wajah hai ke ye maut un par bataur saza aadat ke khilaaf un par musallat ki gai thi isliye us par ahkaame maut jaari nahin kiye gaye yehi wajah hai ke unhein zinda karne ke baad bhi mukallaf banaya gaya.
Aur tehqeeqe riwayat kiya gaya hai ke murdon ko zinda karne ka waaqiya ALLAH TA’ALA ke Nabi hazrat Hazqeel alaihissalam ke zamane mein pesh aaya aur ye murdon ko zinda karna ALLAH TA’ALA ke Nabi ka mojiza hai.
Hazrat Hazqeel alaihissalam ki Kunniyat aur Laqab
-
Kunniyat: Aapki kunniyat Ibnul Ujooz thi kyun ke aapki paidaish ke waqt aapki waalida ki umr zyada thi isliye aap budhiya ke bete ke naam se mashhoor ho gaye.
-
Laqab: Aap ka laqab Zulkifl hai kyun ke aapne 70 Nabiyon ki kafaalat ki aur unko shaheed hone se bachaya. (Ye bhi khayaal kiya jaata hai ke ek ALLAH TA’ALA ke Nabi Zulkifl naam ke bhi hain jinka zikr pehle ho chuka hai wo alag hai).
Faayda
Insaan maut se bhaag nahin sakta isliye ALLAH TA’ALA ne farmaya:
“Farma dijiye hargiz tumhein maut se bhaagna nafa nahin de sakta khwah maut se bhaago ya qatl se, maut apne waqt mein aakar rehti hai”.
Ismein der ya sawer nahin ye humare khayalaate baatila hain ke fulan ko maut be waqt aa gai fulan shakhs kaash safar na karta to ye haadsa pesh na aata. Maut ke waqt insaan ko maut ke munh mein jaana hi hota hai.