Hazrat Hood alaihissalam

Hazrat Hood alaihissalam “aad” qabeela se hain isi qabeela ko “aad aula” kaha gaya hai aur aade saniya hazrat Saaleh alaihissalam ki qaum ko kaha jaata hai jo qaume samood ke naam se zyada mashhoor hai. Hazrat Nooh alaihissalam ki aulaad mein se ek shakhs ka naam “aad” tha uski taraf mansoob hone wali qaum ko “aad” kaha gaya hai. “Aad” ka nasab ye hai: Aad bin Aaus bin Iram bin Saam bin Nooh. Hazrat Hood alaihissalam ka nasab: Hood bin Abdullah bin Ribaah bin Khulood bin Aad. Isi wajah se ALLAH TA’ALA ne farmaya:

“Humne qaum aad ki taraf unke hum qaum Hood ko bheja”.

Yahan kai tarjuma karne walon ne ْ ا َ خ َ اھ ُ م ka tarjuma ‘unka bhai’ kiya hai jo sarasar ghalat hai, poori qaum ke afraad aapke haqeeqi bhai bhi nahin the aur ALLAH TA’ALA ka Nabi kuffar ka deeni bhai bhi nahin ho sakta aap alaihissalam sirf unki qaum ke ek fard the isi wajah se Aala Hazrat Maulana Ahmad Raza Khan Bareilvy ne tarjuma “hum qaum” kiya hai aur yehi Allama Raazi rahmatullahi ta’ala alaihi ki tehqeeq hai.

Hazrat Hood alaihissalam ko aad ka “hum qaum” aur Saaleh alaihissalam ko samood ka “hum qaum” keh kar kuffare makka ka radd kiya jo ye kehte hai ke Muhammad humari hi qaum se hokar Nabi kaise ban gaye? Rab ta’ala ne farmaya qaum aad se Hood alaihissalam the lekin unke Nabi the, samood ki qaum se Saaleh alaihissalam the lekin unke Nabi the.

Hazrat Hood alaihissalam ki aamad wa rifat

Hazrat Hood alaihissalam Nooh alaihissalam se 800 saal baad tashreef laaye aur 464 saal is dunya mein zaahiri hayaat mein rahe aur phir is dunya -e- faani se rehlat farmai aur hayaate jaawidani haasil ki.

Hazrat Hood ne qaum ko kya tableegh farmai

“Kaha aey meri qaum Allah ki bandagi karo uske siwa tumhara koi mabood nahin to kya tumhein dar nahin”.

Aap alaihissalam ne farmaya kya tumhein dar nahin yaani aap ne unke darne ko baa’id samjha aur goya ye kaha ke tum darte hi nahin ho hazrat Nooh alaihissalam ki qaum ko azaab diya ja chuka hai jiska tumhein ilm hai agar tumhein kuchh ALLAH TA’ALA ke azaab ka dar aur khauf hota to zarur tum ALLAH TA’ALA par imaan le aate, butt parasti ki himaaqat na karte.

“Kaha aey meri qaum! Allah ki ibadat karo uske siwa koi mabood nahin sirf iftara baandh ne wale ho. Aey qaum main is par tum se koi ujrat nahin mangta mera ajr to usi ke zimme hai jisne mujhe paida kiya hai to kya tumhein aqal nahin aur meri qaum apne Rab se maafi chaho phir uski taraf rujoo karo tum par zor ki baarish barsayega isse zyada dega aur jurm karte huye roo gardani na karo”.

Hazrat Hood alaihissalam ki qaum butt parast thi khusoosan unke teen bade butt the jinko wo apne bade mabood samajhte the un buton ke naam Saam, Samood aur Haba the. Hazrat Hood alaihissalam ki qaum amaan aur hazre maut ke darmiyaan phaili hui thi ye ek registani waadi thi

170 tAZKIRATUL AMBIYA Hazrate Hood

jiska zikr Quran paak mein is tarah bayan kiya gaya hai:

“Aur yaad karo ‘aad’ ke ‘hum qaum’ ko jab usne inko sar zameene ahqaaf mein daraya”.

Hood alaihissalam ne jab unko aksar shirk se baaz rehne, butt parasti ko chhod ne aur ALLAH TA’ALA ki wehdaniyat par imaan laane ki daawat di to qaum ne aapki takzeeb (jhuthlana) ki to ALLAH TA’ALA ne unse teen saal tak baarish rok li, qehat saali pad gai, unki auraton ko bhi teen saal tak baanjh kar diya, unke bachhon ki paidaish moattal ho gai.

Hood alaihissalam ne teen shakhson ko apni qaum ke paas bheja ke tum unhein samjhao wo teen shakhs the Qeel bin Ashr, Nuaim bin Hazaal aur Mudassir bin Sa’ad ye darhaqeeqat aap par imaan laaye huye the lekin apni qaum se imaan ko chhupaya hua tha in teenon ko bhejne ka maqsad yehi tha ke qaum unhein apna samajh kar unki baat ko manegi aur sochenge ke ye humare apne hi log humein naseehat kar rahe hain to yaqeenan ismein bhalai hogi lekin qaum sochne aur maanne se aari hi rahi aapne qaum ko in teenon ke zariye kehlaya ke ALLAH TA’ALA par imaan lao, Rab ta’ala se maghfirat talab karo aur ALLAH TA’ALA ki taraf khushoo wa khujoo se rujoo karo to ALLAH TA’ALA tumhein zor ki baarish ata karega aur tumhein kaseer maal ata karega aur tumhein bete ata karega aur tumhare liye baarish se neharein aur baghaat banayega aur tumhein pehle se zyada taaqatwar banayega.

ALLAH TA’ALA imaan walon ko deeni aur dunyavi nematein ata farmata hai agarche dunyavi nematon ki koi haisiyat nahin lekin insaani fitrat hai ke wo dunya mein rehne aur dunyavi nematon ko dekhne ki wajah se unki taraf zyada raghbat karta hai aur choonki wo log kheti baadi aur baagh baani ke kaam karte the isliye unke liye isi qism ki nematon ka zikr karna hi munasib tha. Hood alaihissalam ne qaum ko in alfaaz mein raahe raast par laane ki koshish ki:

“Allah se daro aur mera hukm maano aur usse daro jis ne tumhari madad ki un cheezon se ke tumhein maloom hain, tumhari madad ki chaupayo aur beton aur baaghon aur chashmon se main tumhein Allah ke raaste ki daawat deta hoon aur ye kehta hoon behooda kaamon ko chhod do, dunya se dil na lagao tum ko yahan humesha zinda nahin rehna, aise kaam karo jinse tumhein nafa ho”.

Qaum “aad” ki taaqat aur unke kaam

Qaum aad ko apni taaqat par bada naaz tha wo ye kehte the ke hum se badh kar koi taaqatwar nahin ho sakta.

“Wo jo aad the unhone zameen mein naahaq takabbur kiya aur bole hum se zyada kis ka zor hai aur kya unhone na jaana ke Allah jis ne unhein banaya unse zyada qawi hai aur humari aayaton ka inkaar karte the”.

Qaum aad ke chhote qad 60 zara’a (90 feet) aur bade qad 100 zara’a (150 feet) the isi wajah se apne jismon aur taaqat ke ghamand mein ye kehte the ke hum se koi taaqatwar nahin hum pahaad se bade bade patthar chattanein utha kar ek jagah se dusri jagah le jaate hain agar azaab humare saamne aa gaya to hum usey apne hathon se rok lenge. ALLAH TA’ALA ne farmaya:

“tum apni taaqat par naaz karte ho kabhi meri taaqat ko bhi tasawwur mein laaya karo meri taaqat ke muqabil kisi ko koi majaal nahin”.

171 tAZKIRATUL AMBIYA Hazrate Hood

Logon ke sath tamaskhur (mazaaq) ke liye buland nishaan banate

“Kya har bulandi par ek nishaan banate ho raahgeeron se hansne ko”

is aayate kareema ki tafseer mein mukhtalif aqwaal hain:

Ek ye hai ke wo bulandi par buland mehal banate taaki guzarne wale log unki shaan se waaqif ho’n ye kaam choonki be faayda tha isliye تعبثون kaha gaya hai aur humari shari’at mein bhi baghair garze shara’i ke buland tameeraat ki mazammat bayan ki gai hai aur Huzoor ﷺ ne napasand farmaya.
Dusra qaul ye hai ke wo buland imaaratein isliye tameer karte the taaki guzarne wale unse rehnumai haasil karein halanki unka ye kaam bhi be maqsad aur be faayda tha kyun ke sitaron sooraj waghaira se rehnumai haasil ki jaati hai, baadal waghaira ka chha jaana kabhi kabhi hota hai aur khusoosan arab ke sheharon mein to bahut hi kam waaqey hota hai.
Teesra qaul ye hai ke wo buland bridge banate taaki kabootaron ke sath khel mein mashgool ho sakein yaani wo kabootar baazi ke liye abas (bekaar) taur par buland bridge tameer karte.
Chautha qaul ye hai ke wo pahaad mein raasta par makaan tameer karte the taaki choongi haasil kar sakein.
Paanchwa qaul ye hai ke wo buland maqamaat par buland imaaratein tameer karte the taaki wo raaste se guzarne walon se mazaah kar sakein, unka tamaskhur (mazaaq) uda sakein isi aakhiri qaul ke mutabiq Aala Hazrat Maulana Imaam Ahmad Raza Khan rahmatullahi ta’ala alaihi ne tarjuma kiya hai.

Rehne ke liye mazboot mehal banate

Hazrat Hood alaihissalam ne qaum ko samjhaya ke tumhare taur tareeqe aise hain ke tum ye samajhte ho tum ko humesha dunya mein rehna hai halanki dunya faani hai ismein humesha ke liye dil na lagao:

“Aur mazboot mehal chunte ho is ummeed par ke tum humesha rahoge”

ek maayne iska ye bhi hai aur tum zameen mein jama karne ke liye hauz banate ho ye saare kaam isi khayaal se karte the ke hum ko dunya mein humesha rehna hai.

Dusre logon par zulm karte

“Aur jab kisi par giraft karte ho to badi be dardi se giraft karte ho”

Wo jab kisi par giraft karte to usey kode maarte aur talwaar se zarb lagate ya zaalimon ko un par musallat karte jinhein kuchh reham na aata aur adab sikhane ka iraada bhi nahin hota tha aur achhe anjaam ki taraf bhi nazar nahin hoti thi in af’aale qabeeha (bure kaam) par hazrat Hood alaihissalam ne qaum ki mazammat ki.

Faayda: Adab sikhane ke liye, achhe anjaam ke liye ustaad ka shagird ko mamooli maarna, sarzanish karna jaiz hai. Shaikh Sa’adi rahmatullahi ta’ala alaihi farmate hain “ustaad ki maar maa’n baap ke pyaar se behtar hai” lekin qaum ke bachhon ko apne bachhon jaisa samjhe ye khayaal rahe kare ke main apne bachhon ko kitni sarzanish karta hoon kai kai ghante talba ko kaan pakad kar murgha bana dena, itna shadeed maarna ke zakhmi kar dena, sotiyon se shadeed zarb lagana, kai kai ghante class mein khada kar dena, behooda gaali nikaalna ustaad ke shaan ke laayaq nahin aise af’aal sirf talba ko madaaris se bhagane aur deen se mut’naffir karne aur ustaad ke adab wa ahteraam

172 tAZKIRATUL AMBIYA Hazrate Hood

se door karne ke liye kiye jaate hain aise asaataza ko talba qasaab, kameena jaise alqaab dete hain jinko raaqim ne apne kaanon se suna. Aisa ustaad hazaar mein se ek hota hai lekin wo tamam asaataza ki badnami ka sabab banta hai aur deen ke baaghi us ek shakhs ki wajah se deeni madaaris ko kharkaar camp kehte hain halanki is qism ka ustaad schoolon mein bhi koi na koi paaya jaata hai balki ba nisbat deeni madaaris ke schoolon mein is qism ke zaalim zyada hote hain.

Dande se maarna najaiz hai

Bachhe jab das saal ke ho jayein to namaz na padhne ki soorat mein unko hath se maarna zaruri hai lekin dande ya kode se maarna najaiz hai, Nabi Kareem ﷺ ne farmaya:

“jab tumhare bachhe saat saal ke ho jayein to unhein namaz ka hukm do aur jab das saal ke ho jayein to unhein maaro (yaani agar namaz na padhe)”.

Hazrat Allama Shaami rahmatullahi ta’ala alaihi kehte hain ye maarna bhi hath se muraad hai aur wo bhi do teen thappad se zyada na ho’n ustaad ke liye bhi yehi hukm hai, Nabi Kareem ﷺ ne bachhon ko padhane wale ek ustaad mard se kaha ke tum teen zarbon (thappad) se zyada maarne se apne aapko door rakho agar tum ne teen martaba se zyada maara to ALLAH TA’ALA tum se badla lega.

Shaikh Sa’adi rahmatullahi ta’ala alaihi farmate hain “sakhti aur narmi donon ko sath sath rakhna hi behtar hai pichhuwa lagane wala zakhm bhi karta aur marham bhi lagata hai aqalmand bahut zyada sakhti bhi nahin karta aur itni narmi bhi nahin karta ke uski qadr wa manzilat hi kam ho jaaye. Apne aapko bahut zyada aadamkhor bhi nahin banna chahiye aur bahut zyada narm hokar apne aapko zaleel bhi na karo, ustaaz ke liye yehi ek aala sabaq hai ke daraye dhamkaye sarzanish kare ahsaas dilaye aur shafqat bhi kare. Apna rob jamane ke zo’ame baatil mein talba ki nazaron se na gir jaaye aur unki dar parda gaaliyon ka mustahiq na ban jaaye”.

Hood alaihissalam ki qaum ke jawabaat

“Unki qaum ke kafir sardar bole beshak hum tumhein bewakoof samajhte hain aur beshak hum tumhein jhooton mein gumaan karte hain”.

Nukta: Nooh alaihissalam ki qaum ka zikr karte huye farmaya:

“Uski qaum ke sardar bole beshak hum tumhein khuli gumrahi mein dekhte hain”.

Nooh alaihissalam ki qaum ke tamam sardar hi kafir the isliye yahan lafz ک َ ف َ ر ُ و ْ ا istemaal nahin hua lekin Hood alaihissalam ki qaum mein baaz sardar darparda imaan bhi laaye huye the isliye ک َ ف َ ر ُ و ْ ا istemaal hua hai yaani aapki qaum ke kafir sardaron ne kaha isi tarah Nooh alaihissalam ki qaum ne jab dekha ke ye kashti bana rahe hain to qaum ne aapko ٍ ْ ض َ َل َ ل ٍ م ّ ُ ب ِْي se tabeer kiya ke koi paani nahin koi keechad nahin yahan kashti banana khuli gumrahi hai lekin Hood alaihissalam ne unki butt parasti ko safaahat wa himaaqat se tabeer kiya tha to qaum ne bhi kaha “Hum tumhein bewakoof samajhte hain”.

Hood alaihissalam ne qaum ka radd karte huye farmaya “Aey meri qaum mujhe bewakoofi se kya ilaaqa main to parvardigaar e aalam ka rasool hoon main tumhein apne Rab ke paighamaat pahunchata hoon aur tumhara mutamid khair khwah hoon”.

Ambiya -e- kiraam ko unki qaumon ne (maaz’Allah) gumrah aur bewakoof kaha lekin unhone unka jawab is tarah nahin diya balki tehammul mizaji se aur husne akhlaaq se unhein raahe raast

173 tAZKIRATUL AMBIYA Hazrate Hood

par laane ki koshish ki kyun ke Ambiya -e- kiraam ki shaan ke laayaq hi ye hai ke wo behooda baaton ka jawab usi tarah na dein halanki jitni gaali kisi shakhs ko di jaaye utna jawab dena jaiz hota hai lekin Ambiya -e- kiraam ki shaan bahut buland hoti hai unka har kalaam unki shaan ke laayaq hota hai. Hazrat Hood alaihissalam ne qaum ko seedhi raah par laane ki har tarah koshish ki lekin qaum ne humesha kaj rawi ki.

“Qaum ne kaha aey Hood (alaihissalam) tum koi daleel lekar humare paas na aaye aur hum khaali tumhare kehne se apne khuda’o ko chhod ne wale nahin na tumhari baat par yaqeen laane wale hain hum to yehi kehte hain ke humare kisi khuda ki tumhein buri jhapat pahunchi hai”.

Qaum ne kizb bayani karte huye kaha tum humare paas mojizaat aur dalaail nahin laaye jisse haq wa baatil mein tameez ho sake, ye baat yaqeenan maloom hai ke Hood alaihissalam ne mojizaat zaahir farmaye magar qaum ne apni jahaalat ke peshe nazar unka inkaar kiya aur gumaan kiya ke aap koi mojizaat nahin laaye.

Qaum ne kaha ke hum tumhare kehne par apne maboodon ko chhod ne wale nahin ye unka kehna isliye baatil tha ke wo iska iqraar bhi karte the ke nafa wa nuqsaan sirf ALLAH TA’ALA hi ke qabza e qudrat mein hai ye butt nafa wa nuqsaan ke maalik nahin, is par to aqal ka taqaaza ye tha ke butt parasti ko chhod dete, unka butt parasti ko na chhodna aqal ke khilaaf tha jo khud hi unki himaaqat ko waazeh kar raha tha unka ye kehna ke hum tum par imaan laane wale nahin ye sirf zid aur hasad wa anaad tha warna ba zaahir inkaar ki koi wajah na thi. Qaum ka ye kehna ke humare maboodon ki burai tum bayan karte ho unhone tumhein (maaz’Allah) deewana bana diya hai tumhari aqal ko zaaya kar diya hai ye bhi unki himaaqat ko waazeh kar raha tha ke idher ye kehte ke butt nafa wa nuqsaan ke maalik nahin aur uder kehte humare buton ne tumhein musibat pahuncha di hai.

Hood alaihissalam ka qaum ko challenge

“Aapne kaha main Allah ko gawah karta hoon aur tum sab gawah ho jao ke main bezaar hoon un sabse jinhein tum Allah ke siwa shareek thehrate ho tum sab mil kar mera bura chaho phir mujhe mohlat na do maine Allah par bharosa kiya jo mera Rab hai aur tumhara Rab, koi chalne wala nahin jiski choti uske qabza e qudrat mein na ho, beshak mera Rab seedhe raaste par milta hai”.

174 tAZKIRATUL AMBIYA Hazrate Hood

Hazrat Hood alaihissalam ka ye bahut bada mojiza hai ke ek shakhs bahut badi qaum ka muqabla kar raha hai unhein keh raha hai ke tum tamam mil kar meri adaawat (dushmani) mein koi kasar baaqi na chhodo, mujhe nuqsaan pahunchane mein apni poori koshish kar lo, mujhe koi mohlat na do, mujhe tumhara koi khauf wa khatra nahin mujhe to apne Rab par poora bharosa hai wo hi mera muhaafiz hai wo hi mujhe bachane wala hai saari makhlooq usi ke qabza e qudrat mein hai kisi ko zaat baari se muqabla karne ki koi taaqat nahin.

Hood alaihissalam ne qaum ko azaab se daraya

Jab Hood alaihissalam ne apni qaum ko seedhi raah par laane ki poori koshish sarf (kharch) kar di lekin qaum ne butt parasti ko na chhoda to aap ne kaha aey meri qaum ab ALLAH TA’ALA ke azaab ka intezaar karo.

“Phir agar tum munh phero to main tumhein pahuncha chuka jo tumhari taraf dekar bheja gaya aur mera Rab tumhari jagah auron ko le aayega aur tum uska kuchh na bigaad sakoge, beshak mera Rab har shay par nigehbaan hai”.

Aap (Hood) alaihissalam ne farmaya maine ALLAH TA’ALA ke paighamaat tum tak pahuncha diye hain tumhein kamyaabi ka raasta bata diya hai lekin tum ne apni zid na chhodi butt parasti par qaa’im rahe ab Rab ka azaab aane wala hai jo tumhein tabaah wa barbaad kar dega agar tum chaho ke uske azaab ka muqabla karo to tum aisa kabhi nahin kar sakoge wo to tumhein barbaad kar dega lekin tum uska kuchh na bigaad sakoge aur tumhein barbaad karne se uski badshaahat mein koi farq nahin aayega isliye ke wo qudrat ka maalik hai tumhari jagah wo nai makhlooq paida farma dega jo uski ita’at karenge uske hukm ki baja aawari mein koi kami nahin hone denge.

“Beshak mujhe tum par dar hai ek bade din ke azaab ka”

Yaani dunya mein bhi tum par shadeed azaab aayega aur aakhirat mein tum shadeed azaab mein giraftaar hoge isliye ke jis tarah Rab ki nematon ka shukriya ada karna nematon ki zyadti ka sabab banta hai usi tarah ALLAH TA’ALA ki nematon ka kufraan shadeed azaab ka zariya hai.

Rab ta’ala ne irshad farmaya:

“Agar tum ne shukriya ada kiya to main tumhein aur (nematein) dunga aur agar na shukri karoge to mera azaab sakht hai”.

Azaab ka khauf dilane par qaum ka jawab

“Unhone kaha humein barabar chahe tum naseehat karo ya naseehat karne walon mein na ho ye to nahin magar wo aglon ki reet (taur tareeqa) aur humein azaab hona hi nahin”.

Qaum ne kaha humein tumhare azaab ke khauf dilane ki koi fikr nahin hum tumhare wa’az se naseehat haasil karne wale nahin tum bhi pehle Nabiyon ki tarah hi humein azaab se dara rahe ho ye to saabiqa rasm aa rahi hai hum badi taaqat ke maalik hain humein azaab kuchh nuqsaan nahin pahuncha sakta.

Qaum ne azaab ko rehmat samjha

“Phir jab unhone azaab ko dekha baadal ki tarah aasmaan ke kinaare phaila hua unki waadiyon ki taraf aata bole ye baadal hai ke hum par barsega balki ye wo hai jiski tum jaldi karte the ek aandhi hain jismein dardnaak azaab har cheez ko tabaah kar daalti hai apne Rab ke hukm se to subah reh gaye ke nazar na aate the magar unke sone ke makaan, hum aisi hi saza dete hain mujrimon ko”.

Jaisa ke pehle zikr kiya ja chuka hai ke qaum aad par Hood alaihissalam ki takzeeb ki wajah se teen saal tak baarish ko rok diya gaya tha isliye jab qaum par azaab aane ka waqt aa gaya to ALLAH TA’ALA ne syaah baadalon ko chalaya jo unki waadiyon se zaahir huye aam taur par aise baadalon ko mughees (baarish barsane wale) kaha jaata hai wo log waadiyon se uthtey huye baadalon ko dekh kar bade khush huye ke baarish barsane wale baadal aa gaye hain ab teen saala qehat ka daur khatm hone wala hai hazrat Hood alaihissalam ne unhein bataya ye to wo hi hai jiski tumhein jaldi padi hui thi kyun ke wo qaum kehti thi beshak azaab le aao, isse pehli aayate mubaraka mein isi mazmoon ka zikr hai. Aur yaad karo aad ke “hum qaum” (Hood) ko jab usne unko sar zameen ahqaaf mein daraya aur beshak isse pehle dar sunane wale (Ambiya -e- kiraam aur bhi) guzar chuke the aur uske baad aaye ke Allah ke siwa kisi ki ibadat na karo, beshak mujhe tum par ek bade din ke azaab ka andesha hai. Unhone kaha kya tum isliye aaye ke humein humare maboodon se pher do? To hum par lao jiska humein waada dete ho agar tum sachhe ho”.

175 tAZKIRATUL AMBIYA Hazrate Hood

Yaani jab qaum ne mutaalba kiya ke tum jis azaab ke mutalliq humein darate ho wo beshak le aao agar tum apne daawa mein sachhe ho, wo to kehte the azaab aayega hi nahin agar aa hi gaya to hum apni taaqat se rok lenge.

Qaum aad par azaab kya aaya?

“Aur aad mein jab hum ne un par khushk aandhi bheji jis cheez par guzarti usey gali hui cheez ki tarah kar chhodti”.

“Lekin aad wo halaak kiye gaye nihayat sakht garajty aandhi se wo un par quwwat se laga di saat raatein aur aath din lagataar to un logon ko unmein gire huye dekho goya wo khuzoor ke dhundh gire huye to tum unmein kisi ko bacha hua dekhte ho”.

Yaani us qaum par 7 raatein aur 8 din lagataar shadeed aandhi chali sirf ismein garaj thi baarish nahin thi wo hi log jo baadalon ko dekh kar khush ho rahe the aur ye keh rahe the ke azaab to hum apni taaqat se taal (rok) denge jab unhone dekha ke shadeed garaj ne wali aandhi fiza mein haiwanon aur parindon ko uda rahi hai to ye apne makanon mein dakhil ho gaye taaki us aandhi ki shiddat se bach sakein lekin saare daawe dhare ke dhare reh gaye ALLAH TA’ALA ne us firishte ko hukm diya jo hawayein chalane par muqarrar hai ke aad ki qaum par apne hawao ke khazane se itni miqdaar mein hawa khol de jitni miqdaar ek anguthi ki hoti hai, Rab ta’ala ke khazanon mein se ye hawa ba zaahir mamooli thi lekin dunya mein haulnaak toofan tha tabaah kun aandhi thi sabse pehle ek aurat ne dekha ke hawa mein mujhe aag ke shole nazar aa rahe hain us hawa ne makanon ke darwaze gira diye.

“Wo unke nathunon mein dakhil hoti aur unki dubar se nikal jaati wo hawa unhein gira rahi thi unki gardanein toot rahi thi kabhi unhein zameen se uthaya aur phir neeche phenk diya”.

Ret ke teelon mein dab jaate ye silsila 7 raatein 8 din musalsal raha kisi waqt bhi aandhi na ruki wo sab tabaah wa barbaad ho gaye bade bade qadon wale apni taaqat par naaz karne wale Rab ta’ala ki giraft mein jab aaye to aise barbaad huye ke mare huye yoon nazar aa rahe the ke ye khajooron ke tane gire huye hain.

Rab ki azeem qudrat ka andaza kijiye jahan kuffar ko tabaah wa barbaad kar diya wahan Hood alaihissalam aur unki qaum ko najaat di. Hood alaihissalam ne apni qaum ke ird gird khat kheench diya wo shadeed aandhi unhein khushgawar mausame bahaar ki halki halki thandi thandi suhani hawa mehsoos ho rahi thi, Kuffar gir kar tabaah ho rahe the, unki gardanein toot rahi thi, ret ke teelon mein dab rahe the lekin Allah wale, Nabi par imaan laane wale usi aandhi se lutf andoz ho rahe the. Subhan Allah maula e kainaat ki qudrat ka insaan kaise andaza kar sakta tha? Uski hikmaton se wo khud hi waaqif hai, Rab ne irshad farmaya:

“Aur jab humara hukm aaya humne Hood (alaihissalam) aur uske sath ke musalmanon ko apni rehmat farma kar bacha liya aur unhein sakht azaab se nijaat di”.

Yaani kuffar ko dunya mein bhi sakht azaab mein mubtala kiya aur qiyamat mein wo shadeed azaab mein mubtala honge, mominon ko ALLAH TA’ALA ne dunya mein bhi mehfooz rakha aur qiyamat mein bhi mehfooz rakhega. Nabi ki takzeeb Nabi ki gustakhi tabaah kun azaab ko daawat dene ke mutraadif hai, ALLAH TA’ALA imaan par qaa’im wa daaim rehne ki taufeeq ata farmaye aur Ambiya -e- kiraam ki shaan mein gustakhi se bachaye.

176 tAZKIRATUL AMBIYA Hazrate saaleh

Hazrat Saaleh alaihissalam

Hazrat Saaleh alaihissalam qaume samood ki taraf aaye aap alaihissalam bhi samood qaum se hi hain, “samood” ek shakhs ka naam tha uski aulaad qaume samood kehlai. Samood ka nasab Nooh alaihissalam se milta hai yaani samood bin aabir bin iram bin saam bin Nooh aur hazrat Saaleh alaihissalam ka nasab is tarah bayan kiya gaya hai saaleh bin ubaid bin maasikh bin abd bin jaawar bin samood aur samood ka nasab is tarah bhi bayan kiya gaya hai samood bin ubaid bin aaus bin aad bin iram bin saam bin Nooh yehi zyada sahih hai.

Hazrat Saaleh alaihissalam aur hazrat Hood alaihissalam ke darmiyaan 100 saal ka faasla hai yaani Saaleh alaihissalam hazrat Hood alaihissalam ke 100 saal baad tashreef laaye, hazrat Saaleh alaihissalam ki umr 280 saal thi.

Hazrat Saaleh alaihissalam ne qaum ko farmaya

“Aur samood ki taraf unke ‘hum qaum’ Saaleh ko bheja kaha aey qaum Allah ki ibadat karo uske siwa tumhara koi mabood nahin usne tumhein zameen se paida kiya aur usne tumhein basaya to usse maafi chaho phir uski taraf rujoo lao beshak mera Rab qareeb hai dua sunne wala”.

“Jab ke unke ‘hum qaum’ Saaleh ne farmaya kya darte nahin beshak main tumhare liye Allah ka amaanat daar Rasool hoon to Allah se daro aur mera hukm maano aur main tum se kuchh is par ujrat nahin maangta mera ajr to usi par hai jo saare jahan ka Rab hai”.

Ambiya -e- kiraam ki aadate shareefa ye thi ke jab nubuwat ka daawa farmate to sabse pehle qaum ko butt parasti ke chhodne ke mutalliq irshad farmate aur ALLAH TA’ALA ki ibadat karne ka hukm dete ke uske baghair koi mabood nahin phir apni risalat ka daawa karte taaki qaum unse mojizaat ka mutaalba kare to unko mojizaat dikhaye jayein phir unke inkaar aur baaz na aane par ALLAH TA’ALA ke azaab se unko darate phir bhi jab wo apne kufr par qaa’im rehte to ALLAH TA’ALA ki taraf se un par azaab aa jaata.

Aur aap (Saaleh) alaihissalam ne apni qaum ko kaha ke agar tum chahte ho ke ALLAH TA’ALA ki rehmat tumhein haasil ho to ALLAH TA’ALA se apne gunahon ki maafi maango usi ki taraf rujoo karo to ALLAH TA’ALA ki rehmat tumhein haasil hogi ALLAH TA’ALA ki rehmat imaan walon ke qareeb hai.

Aapne qaum ko kaha dunya mein tum ko humesha nahin rehna

“Kya tum yahan ki nematon mein chain se chhod diye jaoge baaghon aur chashmon aur kheton aur khajooron mein jinka shagoofa narm nazuk hota hai aur pahadon mein ghar tarashte ho ustaadi se to Allah se daro aur mera hukm maano aur had se badhne walon ke kehne par na chalo wo jo zameen mein fasaad phailate hain aur islaah ka kaam nahin karte”.

Hazrat Saaleh alaihissalam ne apni qaum ko kaha tumhara khayaal baatil hai ke tum yahan dunya mein hi aaram se nematon mein rahoge, jis Rab ne apni qudrat kaamila se tumhein baghaat,

177 tAZKIRATUL AMBIYA Hazrate saaleh

chashme, khetiyan aur narm wa nazuk shagoofon wale khajoor ke darakht de rakhe hain wo ye bhi le sakta hai. Tumhein dunyavi nematon par naaz nahin karna chahiye aakhir dunya ko chhod kar bhi jaana hai tum badi mahaarat se pahadon ko taraash kar ghar banate ho is wajah se bhi tum seedha yehi samajhte ho ke tum ko dunya mein humesha rehna hai lekin tumhari ye soch sarasar ghalat hai had se tajaawuz karne wale, fasaad phailane wale koi durust achha seedha bhalai wala kaam nahin karne walon ki tum pairwi kar rahe ho tum unki ita’at na karo to kamyaab hoge warna tabaahi ka shikar ho jaoge kamyaabi sirf ALLAH TA’ALA ki taraf rujoo karne aur mera hukm maanne mein hai.

Aapki tableegh se do fareeq ban gaye

“Aur beshak hum ne samood ki taraf unke ‘hum qaum’ Saaleh ko bheja ke Allah ki ibadat karo to jabhi wo do giroh ho gaye jhagda karte Saaleh (alaihissalam) ne farmaya aey meri qaum kyun burai ki jaldi karte ho bhalai se pehle Allah ki bakhshish kyun nahin maangte shayad tum par reham ho”.

Hazrat Saaleh alaihissalam ki tableegh par kuchh log imaan le aaye aur dusre log apne kufr par qaa’im rahe is tarah do giroh ban gaye aapas mein ek dusre se behason mein uljhe rehte the lekin imaan walon ki taraf se jhagda deen ke haq hone mein hota ye jidaal haq hai. Saaleh alaihissalam ki tableegh par qaum ke inkaar aur aapke azaab se darane par qaum ka ye kehna “Aur bole aey Saaleh hum par le aao jis ka tum waada de rahe ho” iske jawab mein Saaleh alaihissalam ne kaha aey meri qaum tum achhai ke badle mein jaldi kyun karte ho yaani ye dunyavi nematon ka aaram tumhein haasil hain lekin iske badle tum azaab aur apni tabaahi wa barbaadi talab kar rahe ho ye kahan ki aqal hai tumhein ALLAH TA’ALA se apne gunahon ki maafi talab karni chahiye taaki wo tum par reham kare.

Qaum ne aapko kya jawab diya?

Saaleh alaihissalam ne qaum ko raahe raast par laane ki koshish ki lekin qaum ne aapki takzeeb (jhutlaaya) ki aur mukhtalif jawab diye.

“Beshak hijr walon ne Rasoolon ko jhutlaaya”

“Hijr” ek waadi hai madeena aur shaam ke darmiyaan jismein samood ki qaum ke log rehte the unhone apne paighamber Saaleh alaihissalam ki takzeeb ki choonki ek Nabi ki takzeeb tamam Ambiya -e- kiraam ki takzeeb hai isliye ke tamam Ambiya -e- kiraam ALLAH TA’ALA ki wehdaniyat par imaan laane aur usi ki ibadat karne ki daawat dete hain aur har Nabi dusre tamam Ambiya -e- kiraam par imaan laane ki daawat deta hai isliye ek Nabi ki takzeeb se dusre tamam Ambiya -e- kiraam ki takzeeb laazim aati hai yehi wajah hai ke Rab ne farmaya “Hijr walon ne Rasoolon ki takzeeb ki” halanki ba zaahir ek Nabi yaani hazrat Saaleh alaihissalam ki wo takzeeb kar rahe the.

Kabhi qaum ne kaha:

“Aey Saaleh (alaihissalam) isse pehle to tum hum mein honhaar maloom hote the kya tum humein apne baap dada ke maboodon ki pooja karne se mana karte ho? Beshak jis baat ki taraf tum humein bulate ho hum us par ek bahut bade dhoke mein daalne shak mein hain”.

Qaum kehne lagi hum ne to tumhein bada aqalmand bahut bada samajhdaar samjha hua tha humein to tum par badi ummeedein thi ke tum humare deen ki imdaad karoge, humare mazhab

178 tAZKIRATUL AMBIYA Hazrate saaleh

ki taqwiyat ka sabab banoge, humare tareeqa ki taa’id karoge. Yaani kisi qaum mein jab bhi koi shakhs ilm wa fazl mein aala maqaam haasil karta hai to qaum usse apne maqsad ke mutabiq ummeedein waabasta kar leti hai aapki qaum ne bhi yehi samjha tha ke humare baatil deen ki imdaad karenge.

Isi tarah aap ghareebon faqeeron par bade meharban the, za’if logon ki imdaad karte the, mareezon ki ayaadat karte the to qaum ne kaha ke hum ne to aapke in ausaaf ko dekh kar ye samjha tha ke tum humare ahbaab mein se hoge, humari imdaad karoge tum ne ye adaawat (dushmani) aur bughz humare sath kaise shuru kar liya? Humein to tum par bada taajjub hai ke tum humein apne baap dada ke maboodon ki pooja se rok rahe ho humein to ab tum par shak hone laga hai ke tum humein kisi bahut bade dhoke mein mubtala karna chahte ho.

Aapne qaum ko jawab diya

“Aapne kaha aey meri qaum bhala batao to agar main apne Rab ki taraf se raushan daleel par hoon aur usne mujhe apne paas se rehmat bakhshi to mujhe usse kaun bachayega agar main uski nafarmani karu? To tum mujhe siwaye nuqsaan ke kuchh na badhaoge”.

Aapke irshad ka matlab ye tha ke mujhe ALLAH TA’ALA ne raushan dalaail ata farmaye hain aur usne mujhe apni rehmat se nawaza hai isiliye main bhi tum par meharbani kar raha hoon ke tumhein us raah ki hidayat de raha hoon jismein tumhari kamyaabi hai tum apni be aqli ki wajah se jis baatil raah ki meri muawanat chahte ho usmein to ALLAH TA’ALA ki nafarmani hai aur ALLAH TA’ALA ki nafarmani khasaara hai.

Mazeed qaum ne ye kaha:

“Unhone kaha hum ne bura shagoon kiya tum se aur tumhare sathiyon se”.

Hazrat Saaleh alaihissalam jab mab’oos huye aur qaum ne takzeeb ki iske baa’is baarish ruk gai, qehat ho gaya, log bhookhe marne lage isko unhone hazrat Saaleh alaihissalam ki tashreef aawari ki taraf nisbat kiya aur aapki aamad ko bad-shagooni samjha aap ne qaum ko jawab diya:

“Aapne kaha tumhari bad-shagooni Allah ke paas hai balki tum log fitne mein pade ho”.

Hazrat Ibne Abbas radiallaho ta’ala anhuma farmate hain ke Saaleh alaihissalam ke irshad ka matlab ye tha ke bad-shagooni jo tumhare paas aai ye tumhare kufr ki wajah se ALLAH TA’ALA ki taraf se aai hai tum fitne mein mubtala ho tumhara apne baatil deen ko sahi samajhna butt parasti par qaa’im rehna ye darhaqeeqat tumhare liye fitna hai.

Qaum ne aapko jadoogar kaha

“Unhone kaha tum par to jadoo hua hai”

Yaani tum par baar baar kasrat se jadoo kiya gaya hai isiliye tumhari aqal salamat nahin rahi tum humare sath bewakoofi ki baatein kar rahe ho ke hum apne aaba wa ajdaad ka deen chhod dein.

Qaum ne aapko mutakabbir kaha

“Unhone kaha hum apne mein se ek aadmi ki taabedaari karein jab to hum zarur gumrah aur deewane hain kya hum sab mein se is par zikr utaara gaya? Balki ye sakht jhoota itraane wala (mutakabbir) hai”.

179 tAZKIRATUL AMBIYA Hazrate saaleh

Qaum ne kaha hum itni tadad mein hokar ek aadmi ki taabedaari karein wo bhi aisa shakhs ho jo humare jaisa bashar ho aisa kaam to deewanon ka hai hum to aqalmand hain kya isi ko nubuwat ata honi thi aur is mansab ke laayaq koi nahin tha? Ye shakhs (maaz’Allah) apne daawa e nubuwat mein jhoota hai aur ye daawa karke shokhiyan maar raha hai itra raha hai ye to bada mutakabbir hai, Rab ta’ala ne unko radd karte huye farmaya:

“Bahut jald kal jaan jayenge kaun tha bada jhoota itraane wala?”

yaani ye qaum jab dunya aur aakhirat mein azaab mein mubtala hogi to phir unhein pata chalega ke kaun jhoota aur baatil raah par zid wa anaad ki wajah se qaa’im reh kar kaun takabbur kar raha tha?

Qaum ne Saaleh alaihissalam se mojiza talab kiya

“Tum to hum hi jaise aadmi ho to koi nishaan lao agar sachhe ho, aapne kaha ye untni hai ek din uske peene ki baari hai aur din muayyan tumhari baari aur ise burai ke sath na chhu’o ke tumhein bade din ka azaab aayega”.

Mukhtasar waaqiya qaume samood

Qaum e aad ke baad ALLAH TA’ALA ne qaume samood ko aabad kiya unko lambi umrein ata ki wo pahadon mein badi mahaarat kaarigari se taraash taraash kar ghar banate, Rab ta’ala ne un ko khushhaal banaya, maali wus’at ata ki to unhone Rab ta’ala ki nafarmani shuru kar di aur zameen mein fasaad barpa shuru kar diya to ALLAH TA’ALA ne unki taraf Saaleh alaihissalam ko bheja jo unke qabeela ke ashraaf yaani sardar qabeela se the. Aap alaihissalam ne unhein daraya, unhone aap alaihissalam se nishani talab ki to aapne farmaya “Tum kaun si nishani talab karte ho? Unhone kaha tum humare sath humari eid ke programon ke liye shehar se baahar humare sath chalna hum apne maboodon se dua karenge tum apne maboodon se dua karna jiski dua qabool ho gayi uski taabedaari karenge”.

Aap alalaihissalam unke sath shehar se baahar tashreef le gaye unhone apne buton se dua ki jo qabool na ho saki, unke ek sardar “janda bin amar” ne ek akeli chattan ki taraf ishaara kiya jiska naam “kaafiya” tha usne kaha is chattan se ek untni nikaalo jo haamila ho agar tum ne aisa kar diya to hum tumhari tasdeeq karenge hazrat Saaleh alaihissalam ne unhein kaha agar main aisa karu to kya tum zarur imaan laoge? Unhone kaha haan to aap alaihissalam ne nawaafil ada kiye aur Rab se dua ki ALLAH TA’ALA ne aapki dua ko sharfe qabooliyat bakhsha, wo log dekh rahe the ke pahadi chattan mein bilkul wo hi kaifiyat paida hui jis tarah kisi janwar par paidaish ke waqt hoti hai dard ki wajah se karaahna iztiraab waghaira yahan tak ke unke saamne wo chattan phati usse haamila untni paida hui jiske jism par oon thi pet bada tha aapka mojiza dekh kar “janda bin amar” aur uske sath chand aur logon ne imaan qabool kar liya baaqi logon ko imaan laane se zawaab bin amar aur habaab aur rabbab bin sam’ar ne mana kar diya. Yehi donon shakhs unke buton par muqarrar the yaani butt khana ke naazim the aur teesra shakhs yaani rabbab bin sam’ar kaahin tha un logon ke saamne hi untni ne bachha jana jo assi untni jitna tha.

Choonki Saaleh alaihissalam ne Rab ke hukm se bayan kar diya tha ke ek din paani peene ki baari untni ki hogi aur ek din tumhari aur tumhare janwaron aur baaqi jungli janwaron aur parindon waghaira ki.

Untni apne bachhe ke sath jungle mein charti thi apne baari ke din untni aur uska bachha saara paani pi jaate the yaani kunwey mein munh rakhti aur uthati us waqt jab paani khatm ho jaata wo dudh itna zyada deti thi ke wo log peete aur apne bartan bhar lete, wo untni garmiyon mein

180 tAZKIRATUL AMBIYA Hazrate saaleh

waadiyon ke zaahiri hissa mein charti thi to untni ko dekh kar unke janwar waadiyon ke nashebi andruni hisse mein bhaag kar chale jaate sardiyon mein wo untni nashebi hissa mein charti to unke janwar bhaag kar waadiyon ke baalai hisse mein aa jaate, unhein is soorat e haal se bahut mushkil darpesh aa rahi thi unhone us untni ko apni raah se hatane ka faisla kar liya aur ise maar diya jaaye taaki humein isse najaat haasil ho jaaye.

Untni ki koonche kaat di

“To unhone aapki takzeeb ki phir untni ki koonche kaat di”

Saaleh alaihissalam ne unhein pehle hi bataya tha ke is untni ko burai mein mas na karna warna tum azaab mein mubtala ho jaoge lekin wo baaz na aaye jab untni ki koonche kaat di to aapne unhein kaha ke ab azaab qareeb aa chuka hai.

“To unhone uski koonche kaat di to Saaleh (alaihissalam) ne kaha apne gharon mein teen din aur barat lo (nafa haasil kar lo) ye waada hai ke jhoota na hoga”.

Azaab se pehle teen din

Jab hazrat Saaleh alaihissalam ne unhein daraya ke ab sirf teen din tumhein apne gharon mein rehna aur nafa haasil karna hai phir tum azaab mein mubtala ho jaoge to qaum ne kaha ke wo teen din hum par kaise guzrenge? Aapne kaha pehle din tumhare chehre zard rang ke ho jayenge dusre din unka rang surkh ho jayega aur teesre din syaah ho jayenge chauthe din tum par azaab aa jayega agarche chehre syaah ho jaane par unhein azaab ka yaqeen aa chuka tha lekin jab tak alaamat par yaqeen nahin aa raha tha us waqt tak unhein imaan aur tauba ki taufeeq naseeb na ho saki aur jab unhein yaqeen hua ab tauba karte bhi to iska koi nafa na hota kyun ke na ummeedi ki haalat mein tauba aur imaan qabool nahin hote.

Sab ki razamandi se ek shakhs ne konche kaati

“Jab iska sabse bada bad-bakht khada hua”

Wo bad-bakht kaun tha?

“Wo bad-bakht Qaddar bin Saalif tha jiska rang surkhi zardi maa’il tha aankhein uski neeli thi qad uska chhota tha”. Agarche untni ki konche us ek shakhs ne kaati lekin sab ke mashware aur sabki razamandi se usne ye kaam kiya isliye Quran paak mein jama ka sigha zikr kiya gaya hai ke sab ne uski konche kaati yehi wajah thi ke sab hi azaab ke mustahiq huye agar sirf ek ka fe’al hota dusre usey tokte is par khush na hote to un par azaab na aata.

Hazrat Saaleh alaihissalam ko shaheed karne ka mansooba

“Aur is shehar mein 9 shakhs the jo fitna wa fasaad barpa karte the us ilaaqa mein aur islaah ki koi koshish na karte unhone kaha aao Allah ki qasam khakar ye ahed kar lein ke shab khoon maar kar Saaleh (alaihissalam) aur uske ahle khana ko halaak kar denge phir keh denge uske waaris se ke hum to (sire se) maujood hi na the jab unhein halaak kiya gaya aur (yaqeen kare) hum bilkul sach keh rahe hain aur unhone jab khufiya saazish ki aur humne bhi khufiya tadbeer ki wo (humari tadbeer ko) samajh hi na sake”.

181 tAZKIRATUL AMBIYA Hazrate saaleh

Allama Qurtubi rahmatullah alaihi likhte hain “Unhone ye saazish untni ki konche kaat ne ke baad ki thi jab hazrat Saaleh alaihissalam ne unhein bataya ke tumhein teen din ki mohlat hai uske baad tum par azaab aayega jo tumhein barbaad karke rakh dega, bajaye iske ke wo is aakhri saazish se chaukanne hote aur apne gunahon par naadim hokar gidgida kar maafi maangte unhone ulta hazrat Saaleh alaihissalam ko qatl karne ki saazish shuru kar di, unhone kaha hum par azaab aayega to dekha jayega uske aane se pehle hum Saaleh alaihissalam aur uske mureedon ka khatma to kar dein”.

Jis raat unhone hazrat Saaleh alaihissalam ke makaan par shab khoon maarne ka program banaya tha us raat ALLAH TA’ALA ne firishton ko apne Rasool ki hifazat ke liye bhej diya, jab ye apni be niyaam talwarein lehrate huye aap par hamla karne ke liye lapke to firishton ne un par pathraaw shuru kar diya unhein patthar to nazar aate the lekin maarne wale dikhai nahin dete the, chunanche un sabko is tarah halaak kar diya gaya aur ye mohlat ki aakhri raat thi chunanche qaum ke baaqi afraad bhi tabaah wa barbaad kar diye gaye, In sha Allah qareeb hi zikr aa raha hai.

Rab ta’ala ne farmaya teen se lekar das tak ya saat se lekar das tak ka giroh. Is qabeela ke 9 sardar the unke ladke hazrat Saaleh alaihissalam ki mukhalifat mein humesha sargarm raha karte the har raiszada ke sath uske madadgaron ki bhi ek toli hua karti thi isliye unhein ٍ تِس ْ ع َ ة ُ ر َ ھ ْ ط se tabeer kiya gaya hai yaani 9 qabeele (agarche 9 shakhs the). Jab unhone ye dekha ke humari iza rasaniyon ke bawajood hazrat Saaleh alaihissalam aur unke sathi baaz nahin aaye to unhone ek jagah baith kar saazish ki ke raat ko bekhabari mein Saaleh alaihissalam aur uske sathiyon par hamla karke unhein teh tegh kar do agar unke kisi waaris ne humse daryaft kiya to hum unhein yaqeen dila denge ke humara unke qatl ke sath door ka bhi waasta nahin aur na hi humein uske qatl ka koi ilm hai to wo khamosh ho jayenge.

Ho sakta hai ke hazrat Saaleh alaihissalam ke waaris kamzor aur ghurba log ho’n to unhone ye khayaal kiya ho ke unhein kya majaal hogi ke humse wo zyada takraar karein? Is tarah wo khamosh ho jayenge, Qatl karne ka mansooba banane wale khud tabaah wa barbaad ho gaye. Subhan Allah maula e kainaat teri qudrat ke kaar naame ajeeb hain.

Qaume samood ke kuffar par azaab e ilaahi

“Pas unhone untni ki koonche kaat di aur apne Rab ke hukm se sarkashi ki aur bole aey Saaleh (alaihissalam) hum par le aao jiska tum waada de rahe ho agar tum Rasool ho to unhein zalzala ne aa liya to subah apne gharon mein aundhe pade reh gaye”.

Qaume samood par zameen ka azaab shadeed zalzala tha aur aasmanon ka azaab sakht bijli ki kadak ya Jibreel ki shadeed haulnaak aawaz thi jiski wajah se unhein tabaah wa barbaad kar diya gaya. Khayaal rahe ke Quran paak mein qaume samood ke azaab ke liye teen lafz istemaal huye hain: “To unhein zalzala ne aa liya” “Aur zaalimon ko chinghaad ne aa liya” In donon ka matlab to wo hi hai jo bayan kiya ja chuka hai ke zameen mein zalzala aur aasmanon se garajdaar aawaz thi, unke azaab ke liye teesra lafz ye istemaal hua “Samood to halaak ho gaye had se guzri hui chinghaad se”

Aala Hazrat Maulana Ahmad Raza Khan Bareilvy rahmatullahi ta’ala alaihi ne is ka tarjuma “Samood to halaak ho gaye had se guzri hui chinghaad se” kiya. Is se pata chala ke الصیحة aur الطاغیة

182 tAZKIRATUL AMBIYA Hazrate saaleh

se muraad ek hi hai taaham baaz mufassereen ne ye maayne bhi kiya hai ke طاغیة se muraad unke jaraa’im wa fasadaat ka had se guzarna hai matlab ye hoga ke wo apne had se badhne wale jaraa’im ki wajah se halaak kiye gaye is maayne ke lihaaz se azaab nahin balki azaab ka sabab hai.

Saaleh alaihissalam aur aapke sath imaan laane walon ko najaat

“Phir jab humara hukm aaya (yaani azaab aaya) hum ne Saaleh (alaihissalam) aur uske sath musalmanon ko apni rehmat farma kar bacha liya aur us din ki ruswai se beshak tumhara Rab qawi izzat wala hai”.

Ye Rab ta’ala ki azeem qudrat hai ke ek hi mulk mein ek hi ilaaqa mein kuffar ko zalzala haulnaak kadak se tabaah wa barbaad kar diya lekin apne Nabi aur unke sath imaan laane walon ko zara takleef na hone di kuffar ko zaleel wa khwar kar diya unko ruswa hona pada lekin imaan walon ko is haulnaak tabaahi aur iski ruswai se bacha liya. Musalmanon ko chahiye ke is waaqiye se ibrat pakdein aur ALLAH TA’ALA ke azaab se darte rahein aur Rab ta’ala ki azeem qudrat par kaamil imaan rakhein.